Add files from ibiblio as of 2025-03-08 22:28:42HEADmain

1 files changed, 2053 insertions, 0 deletions

diff --git a/40466-0.txt b/40466-0.txt
new file mode 100644
index 0000000..a668730
--- /dev/null
+++ b/40466-0.txt
@@ -0,0 +1,2053 @@
+*** START OF THE PROJECT GUTENBERG EBOOK 40466 ***
+
+  A SHORT COMPENDIUM
+  OF THE
+  CATECHISM
+  FOR THE
+  INDIANS,
+
+  with the approbation of the
+  Rt. Rev. FREDERIC BARAGA,
+
+  Bishop of Saut Sainte Marie,
+  1864.
+
+
+
+  _Rev. N. L. SIFFERATH_,
+  Missionary of the Ottawa and Otchipwe Indians.
+
+
+  BUFFALO, N. Y.
+  C. Wieckmann, (Aurora Printing House.)
+  1869.
+
+
+
+
+Mi manda Misinaigans KATECHISM ejinikadeg.
+
+Apitchi weweni ge wi ganawendamegoba, anind sa enishinabewidjig ondjita
+o banadjitonawan ananie misinaiganan, kego dash kinawa Catholik
+ejianamiaieg tibishko dodangeko, apitchi wi ganawendamog ki
+misinaiganiwan, apitchi gaie wi nita wabandamog. Apeingi.
+
+
+
+
+CATHOLIK ENAMIADJIG ODANAMI KOTATIWINIWA.
+
+Kitchitwawendagosi Jesus Christ.
+
+Apeingi.
+
+
+
+
+AGIWI ENAMIADJIG OTCHIBAIATIGONIGEWINIWA.
+
+Odanosowining weosimind, gaie wegosimind, gaie wenijishid manito.
+Apeingi.
+
+
+
+
+ENAMIAIEG WEWENI SAIAGIIGOSIIEG.
+
+Mi sa.
+
+Anonda anamiewinan, gaie anonda anamie akinoamagewinan, kinawa Catholik
+eji anamiaieg, pagwana ge wi iji kikendamegobanin, gaie kinawa
+enishnabewiieg, tchi gashkitoieg ningoting Wakwing tchi ijaieg gi ashkwa
+bimadisiieg ajonda aking. Apeingi.
+
+
+
+
+ODANAMIEWIN AWI DEBENDJIGED.
+
+Nosina wakwing ebiian, apegish kitchitwawendaming kidanosowin, apegish
+bidagwishinomagak, kidogimawiwin, enendaman apegish ijiwebak, tibishko
+wakwing, migo gaie aking. Mijishinang nongo agijigak nin pagwejiganimina
+minik eioiang memeshigo gijig, bonigitedawishinang gaie ga iji
+nishkiinangi, eji bonigitedawangidwa ga iji nishkiiiamindjig, kego gaie
+ijiwijishikange gagwedibeningewining, atchitchaii dash ininamowishinang
+maianadak. Apeingi.
+
+
+
+
+ANJENI ODANAMIKAGEWIN.
+
+Kidanamikon Marie, mwashkineshkagoian jawendjigewin, Debendjiged ki
+widjiwig, awashime ki kitchitwawendagos endadjiwad akwewag,
+kitchitwendagosi gaie ga gagishkawad Jesus, Kitchitwa Marie wegashimik
+Kije Manito, gaganodamawishinang abata ijiwebisiiang, nongo, gaie api ge
+niboiang. Apeingi.
+
+
+
+
+APOSTLEG ODEBWEIENDAMOWINIWA.
+
+Nin debwetawa Kije Manito Weosimind misode gego netawitod, ga gijitod
+wakwi aki gaie. Nin debwetawiman gaie ogwisan baiejigonidjin, Jesus
+Christ Debeniminang, wenijishinidjin Maniton, o gi anishinabewiigon,
+Mariian gagangowinidjin o gi nigiigon. Gi kotagito negwa ogimawinid
+Ponce Pilatan, gi batakakwawa tchibaiatigong, gi nibo, gi nangwawa gaie.
+Anamakamig gi ija, wa ni niso gijigadinig gi abidjiba. Wakwing gi ija,
+namadabi o debaninikaning Kije Maniton weosimimindjin misode gego
+netawitonidjin. Mi dash wadibi ge bi ondjibad, tchi bi dibakonad
+bemadisinidjin, nebonidjin gaie. Nin debwetawa wenijishid Manito, nin
+debwetan kitchitwa Catholik Anamiewigamig, ketchitwawendagosidjig o
+widokotatiwiniwa, batadowini gasiamagewin, abidjibawin eji owiiasing,
+kagini bimadisiwin. Apeingi.
+
+Kitchitwawendagosi Weosimind, gaie wegosimind, gaie wenijishid Manito.
+Epitchi kitchitwawendagosigobane gaiat, gaie nongo, kagini gaie, apine
+gaie kagigekamig. Apeingi.
+
+
+
+
+DEBWEIENDAMOWIN.
+
+Kije Manito Debenimiiang, kakina ga iji akinoamawiiang eji anamiaiang,
+Kin agi ikitoiamba, mi kakina iwi wendji debwetamang.
+
+
+
+
+APENIMOWIN.
+
+Kije Manito Debenimiiang, ondjita gegeti nind apenimomi kiiaw, Jesus
+okotagitowin ondji, tchi nadamawiiang gwaiak, tchi bimadisiiang ajonda
+aking, kagini gaie wadi wakwing, tchi minawasiiang.
+
+
+
+
+SAGIIWEWIN.
+
+Kije Monito Debenimiiang, ondjita ki kitchitwawendagos, ondjita gaie
+kisagiigos, miwendji sagiinang awashime, kakina dash ejiwebak, nin
+sagiananig gaie kakina bemadisidjig kin ondji, epitchi sagiidisoiang, mi
+epitchi sagiangidwa.
+
+
+
+
+WEBINIGE ANAMIEWIN.
+
+Nin windamawa Kije Manito misode gego netawitod kitchitwa Marie kagini
+gagangowid, kitchitwa Michel ketchianjeniwid, kitchitwa John Baptiste,
+kitchitwa Pierre gaie Paul, Jesus ga anonagobanenan, kakina wakwing
+endadjig nin windamawag, gaie kin Nose, kiwindamon, osam gi bata diia,
+gi bata weia, gi bata dodama gaie, nin, nind indowin, nin, nind indowin,
+nin, nin kitchi indowin, mi wendji mamandomag kitchitwa Marie kagini
+gagangowid, kitchitwa Michel ketchi anjeniwid, kitchitwa John Baptiste,
+kitchitwa Pierre gaie Paul, Jesus ga anonagobanenan, kakina wakwing
+endadjig, tchi gaganodamawiwad, gaie kin Nose, gaganodamawishin.
+
+
+
+
+ANWENINDISOWIN.
+
+Kije Manito Nose, ondjita nind anwenindis agi nishkiina agi bata diia,
+ondjita ki kitchitwawendagos, mi wendji jingendama kakina nin matchi
+ijiwebisiwin, kawi gego nind iji jingendansin, eji jingendama nin matchi
+ijiwebisiwin, kin wendji jingendama, epitchi onijishiian, gaie epitchi
+sagiigosiian, jawenimishin, gasiamawishin, Jesus odanosowining ondji
+gasiamawishin, nin gi gijendam minawa, tchi wi bwa bata diia,
+nadamawishin, jawenimishin, kawi minawa nin ga wi bata dissi, ge
+inenimiwane, mi kagini ge diia.
+
+
+
+
+KIJE MANITO ODANGWAMITAGOSIWINAN.
+
+Bejigo Kije Manito misode gego ga gijitod, ki ga bejigo gwanwadjia,
+enigokodeeian ki ga bejigo sagia. Kawi anish Kije Manito ki ga
+wawinassi. Anwebiwini gijigad ki ga gwanwadjiton. Kos kigashi gaie ki ga
+wi minadenimag, ginwenj, tchi bimadisiian ajonda aking. Kego awiia
+nisake. Kego nanaw inadisike. Kego gimodike. Kego gaginawishkike, tchi
+batamadiba awiia. Kego misawinamawiiege kidji bimadisi owidigemaganan.
+Kego gaie awiia misawendamawiiege gego endanidji.
+
+
+
+
+CATHOLIK ANAMIEWIGAWIG ODANGWAMITAGOSIWINAN.
+
+Kiga gwanwadjitonan kitchitwagijigadon ga igongin, tchi wi
+gwanwadjitong. Ki ga anamia epitchi anamesikewinagak, enamiegijigaki,
+dasing gaie ketchitwagijigaki. Weweni ki ga webinige ganage ningoting
+endaso bibonagak, ki ga odapinan gaie kitchitwa Eukaristiwin dasing
+wedjitchisegi Pak. Kiga makadeke nimidana dasogwan abwa odjitchiseg Pak,
+gaie dasing egong, tchi wi makatekeng. Kego midjike wiias
+atchibaiatigogijigak, gaie a makatekegijigak. Api gego netawitoian ki ga
+wi anamie pagidinige iwi endodamowad enamiadjig. Kego widigemake osam
+besho enawemad, kego gaie wikongeke, api wedjitchisegi aginaamading iwi
+dinowa.
+
+
+
+
+KITCHITWA SAKREMAN.
+
+Sigaandadiwin. Songideeshkagewin. Webinigewin. Kitchitwa Eukaristiwin.
+Anamie nominidiwin. Mekateogwanaiewiwin. Anamie widigendiwin.
+
+[Illustration: ornament]
+
+_Kidanamia na?_
+
+Nind anamia sa, Kije Manito Debendjiged nin gi bi jawenimig.
+
+_Wegone dash wendji ikitoian iwi?_
+
+Win sa awi Kije Manito Debendjiged nin gi bi minig Catholik ijitwawin,
+mi dash iwi awashime kitchi migiwewin ga iji mijid.
+
+_Weni dash ga ojitod wi ijitwawin Catholik ejinikadeg?_
+
+Win sa awi Jesus Christ wegosimind o gi bi ojiton iwi Catholik ijitwawin
+edaming, win gaie nitam niso bibon o gi akinoamawan bemadisinidjin
+anamiewin agi baba gagikwed aking, pama dash anind aniniwag metchi
+ijiwebisidjig o gi ojitonawan bakan ijitwawinan, kawi dash bapish
+gwaiakosinsinon, mi eta Catholik ijitwawin aiawang awi Jesus Christ
+odijitwawin.
+
+_Weni dash awi Catholik ejitwad?_
+
+Awia sa daiebwetang enigokodeed od ijitwawin awi Jesus Christ
+Debendjiged, bekish gaie sagaandasod weweni gaie endodang ajiwi awi
+Jesus Christ ga iji angwamitagosid tchi wi dodamingiba odijitwawining,
+ajiwi gaie endodansig gego eji ginaamagengi anamiewin ondji.
+
+_Wegone dash wendji tchibaiatigonigeiang ninawi Catholik ejitwaiang?_
+
+Ajiwi sa a ondji wakwenimang awi Kije Manito Neso bejigod, mi sa
+weosimind, gaie wegosimind, gaie Kitchitwa Manito, mi gaie, tchi wi
+makwenimang awi Jesus Christ ga tapined tchibaiatigong awi
+jawendagosiinang wakwing.
+
+_Wegone dash nilam ge wi kikendang iwi gaie ge wi debwedang awi
+enamiad?_
+
+Manda sa nitam ta akinoamawa, mi sa, misode aia, win awi Kije Manito
+baiejigod, apitchi gaie, gwaiak dibakonige, meno ijiwebisinidjin o mino
+dodawan, metchi ijiwebisinidjin dash okotagian, memindage dash wadi, gi
+ashwa bimadisinid aking, niso bejigo dash awi baiejigod Kije Manito,
+weosimind, gaie wegosimind, gaie Kitchitwa Manito, win dash awi Jesus
+Christ Kije Manito wegosimind gi bi anishinabewiidiso aking, ajiwi gaie
+gi kotagia, kinawi gaie gi ondji batakakwawa tchibaiatigong ajiwi gaie
+agi dapined, tchi mininang wadi kagini bimadisiwin wakwing, kishpin sa
+weweni babamitawang aking od ijitwawining, kagini gaie ta bimadisiwag ki
+tchibaminanig, ka dash wika ta nibossiwag, kawi gaie awiia gashkitossi
+gego, tchi mino dodang, tchi mino ijiwebisid gaie bwa minigod aniwi Kije
+Maniton o jawendjigewinini, iwi sa eta, jawendjigewining kidondji
+gashkitona tchi mino ijiwebisiiang aking epitchi bimadisiiang, pama gaie
+gi niboiang aking, ningoting wadi wakwing, tchi pindigeiang.
+
+_Weni dash awi gwaiak ekinoamonang iwi odijit wawin awi Debendjiged?_
+
+Awiia sa Catholik mekateogwanaie enind, apitchi go gwaiak akinoamage
+anamiewin Jesus Christ od ijitwawin.
+
+_Mekateogwanaiewiwag na gaie winawa bakan gegikwedjig?_
+
+Ka pabish agiwi bakan ejitwadjig mekateogwanaiewissiwag, ka sa awiia o
+gashkitossin bakan ijitwawining, tchi ondji mekateogwanaiewipa, ma tchi
+aniniwag agi ojitowad bakan ijitwawinan, agi webinamowad Catholik
+ijitwawin.
+
+_Weni dash awi Kije Manito enind?_
+
+Win sa awi ga gijitod misode gego, wakwi, aki gaie, mi go awi Kije
+Manito enind.
+
+_Wegone dash ga aiod awi Kije Manito agi ojitod kakina gego, wakwi, aki
+gaie?_
+
+Ka gego o gi aiossin, kawi sa gego gi atessino waieshkat, mi eta win
+odinendamowin odikitowin gaie ga aiod iwipi awi Kije Manito Debeniminang
+megwa agi ojitod kakina go misode gego, wakwi, aki gaie.
+
+_Tani dash minik dasogwan ga dajitad awi Kije Manito megwa agi ojitod
+kakina gego?_
+
+Ningotwasogwan sa gi dajita megwa agi ojitod misode gego.
+
+_Wegone dash ningotwasogwan ga ondji dajitad awi Kije Manito agi ojitod
+kakina gego?_
+
+Ondjita sa gi iji dodam iwi, tchi akinoamonang tibishko ge widodamang
+gaie kinawi, ningotwasogwan, tchi wi anokiiang kiiawinanin ondji, dasing
+dash eko nijwasogwanagak, tchi wianokitawangwa ki tchibaminanig ondji
+awi Kije Manito ge wi nita anokitawang, memindage dash aj anamiegijigak.
+
+_Kagini na gi aia awi Kije Manito enind?_
+
+Kagina sa go gi aia, kagini gaie da aia awi Debeniminang.
+
+_Tanipi dash eiad awi Kije Manito enind?_
+
+Misode sa aia aking, wadi gaie wakwing, ka ma ningotchi ashkwa aiassi.
+
+_Kakina na o kikendan o gashkiton gaie awi Kije Manito enind?_
+
+Kakina sa go gego o kikendan iwi ga bi ijiwebadinig awi Kije Manito o
+kikendan, win gaie kakina o wabandan, misawa gaie gego ano kakitong
+apitchi, potch dash o wabandan gaie iwi, win gaie o gashkiton kakina
+gego, tchi ojitod, odinendamowin eta, od ikitowin gaie, tchi aiod.
+
+_Ki da gashkitomi na ajonda aking, awi Kije Manito, tchi wabamang?_
+
+Ka wika aking ki da gashkitossimi, tchi wabamang awi misode eiad, kawi
+sa nagosissi aking wadi eta ajita bimadisiwining wabama.
+
+_Batinowag na Kije Manitog?_
+
+Ka bapish batinissiwag, bejigo sa eta awi Kije Manito, niso bejigo dash,
+mi sa, weosimind, gaie wegosimind, gaie Kitchitwa Manito, potch dash
+kawi bapish nisissiwag Kije Manitog, niso bejigo sa eta awi baiejigod
+Kije Manito enind, mi sa, awi weosimind Kije Manitowi, gaie win awi
+wegosimind Kije Manitowi, gaie win awi Kitchitwa Manito Kije Manitowi,
+anawi dash bejigo eta awi Kije Manito Nesobejigod, bejigwanini sa okije
+Manitowiwiniwa agiwi nesidjig.
+
+_Weninan dash awashime gwenatchiwinidjin minik awi Kije Manito ga
+ojiadjin?_
+
+Anjeniwan sa anishinaben gaie endasowinsonidjin.
+
+_Weninag dash agiwi anjeniwag enindjig?_
+
+Mino Manitowiwag sa agiwi aianjeniwidjig, kawi dash tibinawe
+owiiawissiwag.
+
+_Tanipi dash awi Kije Manito ga asad aniwi anjeniwan ga ojiadjin?_
+
+Wakwing sa o gi asan aniwi aianjeniwinidjin, tibinawe odoginmawiwining
+awi Kije Manito Nesobejigod.
+
+_Agiwi na anjeniwag ginwenj kakina mamawi wadi wakwing gi aiawag?_
+
+Kawi anind ginwenj gi aiassiwag wadi wakwing, gi maminadisiwag sa anind
+agiwi anjeniwag, aniwi Kije Maniton o gi de apitenimonawan, mi dash
+aniwi Kije Maniton agi ondji apaginigowad anamakamig kagini ashkoteng,
+matchi manitog dash ijinikasowag agiwi ga anjeniwidjig.
+
+_Tani dash ga ijinikasowad nitami nij ka bimadisidjig aniwi Kije Maniton
+tibinawe ga ojiigodjig?_
+
+Anini sa Adam gi ijinikaso, Akwe dash Eva gi ijinikaso.
+
+_Mi na agiwi najidjig, Adam, Eva gaie, kakina go kinawi wendji
+ondadisiiang?_
+
+Kakina sa go bemadisidjig aniwi nij anishinaben ondadisiwag,
+waiabishkiwedjig, kakina gaie enishinabewidjig, kakina gaie
+makatewiiasag ajiwi wendji ondadisiwad.
+
+_Tanipi dash awi Kije Manito ga asad nitami aniniwan, aniwi gaie nitami
+akwewan ga ojiadjin?_
+
+Wadi sa kitchi kitiganing o gi asan, apitchi dash gi kitchi
+gwanadjiwanogoba iwi kitigan, nibina gaie maniwidjig mitigog iwipi gi
+patakisowagoba ajiwi kitiganing.
+
+_Wegone dash awi Kije Manito ga iji ginaamawaa aniwi nij ga
+bimadisinidjin wadi kitiganing?_
+
+O gi iji ginaamawan sa, tchi wi bwa midjinid egodenig bejig aniwi
+mitigon, nawaii dash iwi gwanadj kitiganing gi patakisogoba awi mitig
+wendji ginaamawimindwa.
+
+_O gi babamitawawan na aniwi Kije Maniton ga iji ginaamagowadjin?_
+
+Kawi o gi babamitawassiwan, kidwe sa o gi midjinawa iwi aiano kitchi
+ginaamawindwa, tchi wi bwa midjiwapa, mi dash agiwi nij ga bimadisidjig
+agi batadowad, ajiwi sa agi agonetawawad, aniwi Kije Maniton wa kitchi
+babamitawawadjin.
+
+_Weninan dash aniwi ga dodamoigowadjin agi batadowad?_
+
+Matchi maniton sa o gi dodamoigowan iwi, ginebigong agi bi ijinagwionid,
+mi dash win awi akwe ga bi iji gagansomigod agi midjid iwi, pama dash
+gaie win iwi o gi ondji ashaman aniwi aniniwan, mi dash neienj agi
+babamitawassigwa aniwi Kije Maniton ga iji ginaamagowadjin.
+
+_Tani dash ejinikadeg iwi batadowin ga iji batadowad nitami nij ga
+bimadisidjig wadi gwanadj kitiganing?_
+
+Manda sa, batadowin bi gaginigiiang, mi iwi ejinikadeg.
+
+_Kakina na bemadisidjig o gi anigaigonawa iwi batadowin ga iji batadowad
+nitami nij ga aiadjig aking?_
+
+Kakina go bemadisidjig aking o gi anigaigonawa iwi batadowin, kakina sa
+anishinabeg wendadisidjig ogagishkanawa iwi batadowin, kakina go ajiwi a
+bi gaginigiiang iwi batadowining, win dash eta awi kitchitwa Marie, kawi
+wika o gi aiansin iwi batadowin bi gaginigiiang.
+
+_Tapi dash gaiasiigadeg iwi batadowin bi gaginigiiang?_
+
+Api sa gwaiak sagaandagoiang, gasiigade iwi batadowin abwa sigaandasod
+awiia mojag o gagishkan iwi, kawi dash o da gashkitossin win wadi
+wakwing, tchi pindiged, kishpin nibod abwa mashi sigaandasod, mi dash
+ajiwi awi Jesus Christ ga ondji angwamimad kakina go bemadisinidjin,
+tchi wi sigaandasonid.
+
+_Tani dash awi Kije Manito ga dodawad nitami nij anishinaben agi bata
+dadaminid kitchi kitiganing?_
+
+O gi sagidjinajawan sa iwi gwanadj kitiganing, mi dash agi onidjanisiwad
+eshkam nibina bemadisidjig agi bi ondji aiawad aking.
+
+_Gi mino ijiwebisiwag na waiejkat ga bi bimadisidjig aking?_
+
+Kawi gwetch gi mino ijiwebisissiwag, sasagwana sa o gi nishkiawan aniwi
+Kije Maniton Nesobejigonidjin.
+
+_Tani dash awi Kije Manito ga dodawad aniwi ga matchi ijiwebisinidjin?_
+
+Kakina sa nibing o gi dapinean, mi go eta nishwaswi ga mino
+ijiwebisinidjin o gi bimadjian.
+
+_Tani dash ga iji dodang awi Kije Manito agi nodjimoad aniwi ga mino
+ijiwebisinidjin?_
+
+O gi inan sa Noean bejig aniwi nishwaswi ga mino ijiwebisinidjin, tchi
+ojitonid kitchi nabikwan, ajiwi dash agi bosinid, mi dash win awi Kije
+Manito agi gimiwanitod apine nimidana daso gijig, nimidana gaie daso
+tibik misode aking, mi dash kakina agi moshkaang aki, kakina dash ga
+bimadisidjig iwipi gi dapinewag, nibing, mi go eta agiwi ga bosidjig
+ajiwi kitchi nabikwaning, kawi ajiwi nibing o gi dapineigossiwan aniwi
+Kije Maniton ga mino anokitawawadjin gwaiak agi ijiwebisiwad.
+
+_Awashime na iwipi ga bimadisidjig gi ni mino ijiwebisiwag ga ashkwa
+moshkaang aki?_
+
+Nitam gegeti awashime gi mino ijiwebisiwag, o gi gosawan sa aniwi Kije
+Maniton ga bimadjiigowadjin, pama dash agi ni batinowad agiwi ga
+bimadisidjig, minawa dash gi matchi ijiwebisiwag agi onenimawad aniwi
+Kije Maniton Nesobejigonidjin, mi dash sasagwana ajiwi omatchi
+ijiwebisiwiniwang agi ondji animisiwad aking ga apitchi bimadisiwad.
+
+_Wegone dash iwi ga iji wikwadjitamasowad kakina bemadisidjig ajiwi
+batadowining a bi ondji nigiwad aking?_
+
+Ajiwi sa go gi iji wikwadjitamasowag anamakamig kagini ashkoteng, tchi
+danakisowad, ningoting gi ashkwa bimadisiwad aking.
+
+_O gi agwashimigowan na aniwi Kije Maniton kagini ashkoteng?_
+
+Aninde, o gi agwashimigowan wadi ashkoteng, ogwisan sa, Jesus,
+ejinikasonidjin agi ininajawad aking, mi dash agiwi gwaiak
+sagaandasodjig, agiwi gaie gwaiak daiebwetangig Catholik ijitwawin,
+agiwi gaie weweni endodangig kakina gego ge wi dodamowapa ajiwi od
+ijitwawining awi Jesus Christ Debendjiged, mi agiwi wadi ge
+jawenimindjig ajita bimadisiwining.
+
+_Weni dash awi Jesus Christ enind?_
+
+Odogwisimigon sa aniwi Kije Maniton weosimimindjin, gaie win awi Jesus
+Christ enind Kije Manitowi, bekish gaie aniniwi, win sa gi
+anishinabewiidiso aking kinawi ondji awi jawendagosiinang wakwing.
+
+_Tani dash ejiwebisid awi Jesus Christ aji Kije Manitowid?_
+
+Ajiwi sa od oosiman aniwi Kije Maniton baiejigonidjin, kawi dash
+ogashissi awi Jesus Christ eji Kije Manitowid.
+
+_Tani dash ejiwebisid awi Jesus Christ aji anishinabewid?_
+
+Ajiwi sa od ogwisimigon aniwi Kitchitwa Mariian kagini gagangowinidjin,
+kawi dash oosissi awi Jesus Christ eji aniniwid, win sa awi kitchitwa
+Joseph o gi nitawigian eta aniwi Kije Maniton wegosimimindjin, kawi
+dash od ogwisimassin.
+
+_Weni dash awi kitchitwa Joseph enind?_
+
+Win sa o gi widjaiawan aniwi Kitchitwa Mariian aiapitchi binisinidjin,
+ondjita, tchi nitawigiad aniwi Jesusan agi abinodjiiwinid, bekish gaie
+agi ganawenimad aniwi mino akwewan, mi go eta awi kitchitwa Joseph
+enind, iwi ga ondji widjaiawad Mariian.
+
+_Weni dash awi ga nigiad aniwi Jesusan eji anishinabewinidjin?_
+
+Win sa awi kitchitwa Marie o gi iji nigian aking, ningoting sa o gi bi
+anamikagon anjeniwan, iwipi dash o gi bi agawateshkagon o
+mashkawisiwinini aniwi Kije Maniton ondji Kitchitwa Maniton, mi dash
+ajiwi ga ondji nigiad aniwi Jesusan wegosimadjin, kawi dash anawi wika o
+gi kikenimassin aniniwan.
+
+_Tanipi dash aking ga daji nigid awi Jesus Christ Debendjiged?_
+
+Wadi sa odenawing, Bethlehem ejinikadeg pijikiwigamigong gi daji nigi
+awi Debendjiged, ondjita dash gi iji tabasenindiso kitimagisiwining agi
+bi ondadisid, tchi akinoamonang, gaie kinawi, tchi wi tabasenindisoiang,
+mojag gaie, tchi wi minwendamang, kishpin gaie odisikagoiang
+kitimagisiwin.
+
+_Tani dash ejinikadeg iwi epi gwenwadjitong onigiwin awi Jesus Christ
+Debendjiged?_
+
+Niba anamie gijigad sa ijinikade, ajiwi anishinabemowining.
+
+_Tani dash iwi ga ijiwebak iwipi agi bi nigid aking awi Jesus Christ
+Debeniminang?_
+
+Anjeniwag sa o gi bi windamawawan manishtanishiwininiwan iwipi o
+nigiwinini aniwi Jesusan Debendjigenidjin, iwipi gaie bejig gwanatch
+anang gi bi nagosi ashpiming, niswi dash kitchi ogimag wasa o gi ondji
+wabamawan aniwi anangon, mi dash pabige wadi Bethleheming ga ijawad a gi
+anamietawawad aniwi Jesusan iwipi ga bi abinodjiiwinidjin.
+
+_Tani dash daso bibon ga widjaiawad onigiigon awi Debendjiged?_
+
+Nisimidana sa daso bibon o gi widjaiawan aniwi ga nitawigiigodjin aking.
+
+_Tanipi dash ga danisid awi Jesus Christ ga apitchi widigemad o
+nigiigon?_
+
+Wadi sa odenawing gi danisi, Nazareth ejinikadeg.
+
+_Tani dash ga ijiwebisid awi Jesus Christ api nesimidana daso
+bibonagisid?_
+
+Iwipi sa go gi webi baba gagikwe agi ojitod Catholik ijitwawin ga
+mininang, tchi ondji jawendagosiiang.
+
+_Tanipi dash ga ijad awi Debendjiged nakawe abwa mashi webi baba
+gagikimad bemadisinidjin?_
+
+Pagwadakamig sa gi ija, mi dash wadi nimidana dasogwan a gi makateked,
+gi anamia gaie.
+
+_Weninan dash aniwi ga nakweshkawadjin awi Debendjiged wadi Pagwadakamig
+agi ijad?_
+
+Aniwi sa kitchitwa John Baptistan o gi nakweshkawan megwa agi
+sigaandagenid, gaie dash win awi Jesus Christ o gi sigaandagon.
+
+_Tani dash ga ijiwebak iwipi go ga apitchi sigaandawind awi
+Debendjiged?_
+
+Iwipi sa o gi nondawawan aniwi Kije Maniton weosimimindjin, ikitonid
+ashpiming, mi maba Ningwis Saiagiag, nin, ketchi minwenimag, mi dash win
+awi Kitchitwa Manito, wabmiming agi bi ijinagosid, mi gaie aniwi Jesusan
+epitchi sigaandawimindjin agi bonindawad.
+
+_Tani dash minik daso bibon ga baba gagikwed awi Debendjiged iwipi agi
+biakinoamaged odijitwawin aking?_
+
+Gwaiak sa niso bibon gi akinoamage aking anamiewin ondji.
+
+_Weninan dash aniwi ga owenabamadjin awi Jesus Christ agi baba
+widjiwigod aking ga apitchi gagikimad bemadisinidjin?_
+
+O kitchi mekateogwanaieman sa o gi owenabaman, aniwi ga baba
+widjiwigodjin megwa agi baba gagikwed, iwipi gaie nibina wendjita
+mekateogwanaien o gi owenabaman, awi Debendjiged, agi ininajawad misode
+aking awi ga gikwenodaminid Catholik ijitwawin.
+
+_Wegone dash ga bimi dodang awi Jesus Christ bekish agi akinoamaged?_
+
+Mamakadakamig sa gi bimi dodam, agi nisakonamawad gegibingwenidjin
+oshkinjigonini, nibina gaie aiakosinidjin o gi nodjimoan, an nd gaie
+nebonidjin o gi abidjibaan, nibina gaie bakan gi baba mamandadodam iwipi
+aking awi Debendjiged.
+
+_Wegone dash ga ondji mamandadodang aking awi Debendjiged?_
+
+Ajiwi sa, awi wabandaiwed o Kije Manitowiwin ga ondji mamandadodang
+aking ga apitchi nagosid.
+
+_Tanipi dash ga ijiwinigod aniwi jangenimigodjin awi Jesus Christ agi
+batamigod od ijiwebisiwin ondji?_
+
+Dibakonigewining sa o gi ijiwinigon, mi dash aniwi kitchi
+dibakonigewininiwan, Ponce Pilate ga ijinikasonidjin agi dibakonigod.
+
+_Tani dash ga dodawind awi Jesus Christ ga ashkwa dibakonind?_
+
+Iwipi sa gi kitchi bajanjewa awi Debendjiged, bekish gaie gi basikwebina
+minesagawandjin ondji, mi dash agi batakakwaond tchibaiatigong, mi gaie
+ajiwi agi dapined, kinawi a bata diiang.
+
+_Wegone dash iwi ga ondji dapined tchibaiatigong awi Jesus Christ Keje
+Manitowid?_
+
+Kinawi sa gi ondji dapine tchibaiatigong awi agwashiminang wadi kagini
+ashkoteng ga wikwadjitamasoiang agi bata diiang.
+
+_Kakina na bemadisinidjin o wi jawendagosian awi Jesus agi dapined
+tchibaiatigong?_
+
+Anawi gegeti kakina go anishinaben ajiwi o wi ondji jawendagosian,
+kishpin dash awiia ondjita apitchi agonetang Catholik ijitwawin, ka dash
+win ta ojimoassi kagini animisiwining ajiwi sa go aj agonetawad aniwi
+Jesusan Debendjigenidjin, agiwi dash weweni bebamitawadjig, ajiwi
+anamiewining ta ondji jawendagosiwag.
+
+_Tanipi dash ga daji batakakwaond, tchibaiatigong awi Debendjiged?_
+
+Wadi sa bejig wadjiwing, Calvaire ejinikadeg, tchigaii Jerusaleming.
+
+_Tapi dash ga nibod awi Jesus Christ Debendjiged?_
+
+Iwipi sa aminokamig, nijogwan abwa odjitchiseg Pak.
+
+_Tani dash ejinikadeg iwi gijigad api ga nibod awi Debendjiged?_
+
+Anishinabemowining sa kitchitwa tchibaiatigogijigad, ijinikade.
+
+_Tani dash minik daso bibon ga bimadisid aking awi Jesus Christ wakwing
+wendjibad?_
+
+Iwipi sa nisimidana ashi niso bibon gi bimadisi aking agi bi nagosid awi
+Debendjiged.
+
+_Tanipi dash ga ijanid awi Jesus Christ otchibaman, iwipi ga apitchi
+atenig wiiaw tchibekamigong?_
+
+Iwipi sa gi ijawan ningotchi anamakamig, agi windamawad ajiwi ga
+aianidjin waiba wakwing, tchi ijanid kagini minawanigosiwining.
+
+_Weninag dash agiwi ga aiadjig wadi ga daji ijanid otchibaman awi
+Debendjiged?_
+
+Agiwi sa ga mino ijiwebisidjig aking, gaiat ga nibodjig, abwa mashi
+dapined tchibaiatigong awi Debendjiged, o gi bwanawitonawa dash wakwi.
+
+_Wegone dash ga ondji bwanawitowad wakwing awi ijawad agiwi gaiat ga
+mino nibodjig aking?_
+
+Kawi sa awiia o gi gashkitosin wadi wakwing, tchi ijad, iwipi awi Jesus
+Christ abwa mashi nibod aking, gi gibakwaigade sa wakwi, win dash awi
+Debendjiged ki gi nisakonamagona wakwi, iwipi agi bi kotagitod aking.
+
+_Tapi dash ga abidjibad awi Jesus Christ agi nibod?_
+
+Api sa wa ni niso gijigadinig iwipi ga ako nibod gi abidjiba.
+
+_Tani dash ejinikadeg iwi gijigad, api ga abidjibad awi Debendjiged?_
+
+Pak sa ijinikade, ajiwi wemitigojimowining.
+
+_Tani dash minik dasogwan ga widigemad odakinoamaganan awi Jesus Christ
+ga ashkwa abidjibad?_
+
+Nimidana sa dasogwan iwipi keiabi o gi widjaiawan, minawa gaie agi
+akinoamawad aniwi ga mekateogwanaiewinidjin Catholik ijitwawin ondji.
+
+_Tanipi dash ga ijad awi Jesus Christ nimidana ga dasogwanagadinig iwipi
+ga ako abidjibad!_
+
+Wakwing sa gi ija iwipi awi Debendjiged, anamadabid odebaninikaning osan
+Kije Maniton misode gego netawitonidjin.
+
+_Tanipi dash eiad nongo awi Jesus Christ ga nodjimoinang?_
+
+Aji Kije Manitowid sa misode aia, aji anishinabewid dash wadi wakwing
+aia, bekish gaie bi abi kitchitwa Eukaristiwining.
+
+_O nagatan na wakwi awi Jesus Christ abiabid ajiwi kitchitwa ostiwining
+enamesikengi?_
+
+Kawi iwi o nagatansin, bekish sa aia wakwing, bekish gaie bi abi ajiwi
+kitchitwa Eukaristiwining.
+
+_Tapi dash minawa ge bi ijad aking, awi Jesus Christ Debendjiged?_
+
+Api sa bi ashkwa akiwaninig minawa ta bi ija aking, tchi dibakonad
+bemadisinidjin aniwi gaie nebonidjin.
+
+_Tani dash dasing ge dibakoninang awi Debendjiged?_
+
+Nijing sa ki ga dibakonigona, nitam igo pabige ga niboiang, bebejig
+iwipi, tchi dibakoninang, pama dash bi ashkwa akiwang, kakina mamawi o
+ga dibakonan bemadisinidjin, aniwi gaie nebonidjin, mi sa, win awi
+gwaiak Debakoniged iwipi o ga pagidinan aniwi ge gi mino ijiwebisinidjin
+wakwing, tchi ijanid, aniwi dash ge gi matchi ijiwebisinidjin iwipi o ga
+madjinajawan anamakamig.
+
+_Weni dash awi Kitchitwa Manito?_
+
+Kije Manitowi sa awi Kitchitwa Manito, tibishko eji Kije Manitowid awi
+weosimind, gaie awi wegosimind, bejigwanini sa okijemanitowiwiniwa agiwi
+nesidjig manitog.
+
+_Tani dash ejinikadeg iwi gijigad api awi Jesus Christ ga bi ininajawad
+aniwi Kitchitwa Maniton a wi bi songideeshkawanid omekateogwanaieman?_
+
+Pantkot sa ijinikade, mi iwipi memindage Catholik enamiadjig a kitchi
+gwanwadjiawad aniwi Kitchitwa Maniton.
+
+_Tapi dash maninang awi Kitchitwa Manito o jawendjigewin?_
+
+Asigaandagoiang sa, api gaie weweni manigoiango bejig aniwi kitchitwa
+Sakreman najwadjingin.
+
+_Wegone dash iwi kitchitwa Catholik anamiewigamig edaming?_
+
+Kakina sa Catholik ejitwadjig misode aking eiadjig iwi iji inawag,
+winawa kakina mamawi tetibishko a iji debweiendamowad, tetibishko gaie a
+ijitwawad, gwaiak gaie, a babamitawawad o mekateogwanaiemiwan, ondji awi
+Debendjiged.
+
+_Weninag dash agiwi enamie widokodadidjig?_
+
+Kakina sa ketchitwawendagosidjig wakwing ebidjig, winawa gaie kakina
+mamawi Catholik ejitwadjig, kakina gaie gasiiakisowining ebidjig anamie
+widokodadiwag, ondji awi Neso bejigod.
+
+_Tani dash kinawi eji anamie widokawangwa agiwi ketchitwa wendagosidjig
+wadi wakwing ebidjig?_
+
+Ki gwanwadjiananig sa, gaie dash winawa ki gaganodamagonanig.
+
+_Tani dash ejianamienadamawangwa agiwi gasiiakisowining ebidjig?_
+
+Kigaganodamawananig sa, tchi jawenimigowad Debendjigenidjin.
+
+_Tapi dash gaiasiigadegin kibatadowininanin?_
+
+Sigaandagoiang sa, api gaie weweni kwapeseiango Catholik ijitwawining
+ondji awi Debendjiged.
+
+_Tani dash ge ijiwebisiwad kakina nebodjig api bi ashkwa akiwang?_
+
+Kakina sa nebodjig ta abidjibawag iwipi otchibamiwan a wi nasikamowad
+wiiawiwan, tchi dibakonindwa wadi kitchi dibakonidiwining od
+ijiwebisiwiniwa ondji.
+
+_Tani dash ge dadowindwa kakina bemadisidjig gaie nebodjig gi ashkwa
+dibakonigowad aniwi Jesusan Debakonigenidjin!_
+
+Agiwi sa ge gi mino inadisidjig wakwing ta ijawag, agiwi dash ge gi
+matchi ijiwebisidjig anamakamig ta apaginawag.
+
+_Keiabi na ta dago gasiiakisowin gi ashkwa akiwang?_
+
+Kawi keiabi iwipi iwi ta dagossino, mi sa go iwi apitch wakwi eta ge
+dagog, anamakamig gaie.
+
+_Weni dash awi nebod wadi gasiiakisowining ejad?_
+
+Awi sa batadowinensing endapined, ajiwi keiabi a sagiigod aniwi Kije
+Maniton Debendjigenidjin.
+
+_Weni dash awi nebod wadi wakwing ejad?_
+
+Awi sa Catholik ijitwawining meno dapined, Ajiwi akitchi sagiigod aniwi
+Kije Maniton Nesobejigokidjin.
+
+_Weni dash awi nebod wadi anamakamig ejad?_
+
+Awi sa ajiwi kitchi batadowining endapined, wadi kagini kotagi
+bimatisiwining pindige.
+
+_Tani dash ejiwebak anamakamig?_
+
+Kagini sa kotagi bimadisiwin dagomagad wadi anamakamig, kagini ashkotong
+a danakisong matchi Manito endad.
+
+_Tani dash ejiwebak wakwi?_
+
+Wadi sa wakwing dagomagad kagini mino bimadisiwin, kagini a
+minawanigosing, Kije Manito endad.
+
+_Wegone dash iwi anamiewin ekitong?_
+
+Anamiewin sa dago ajiwi, awiia genonadji Kije Maniton, odeing wa ondji
+gwanwadjiadjin.
+
+_De onijishin na, tchi gigitong eta api enamiangi?_
+
+Kawi de onijishinsino, anish, tchi ikitong eta anamiewin, ta wi
+nanagatawendam sa ekitong aj anamiang.
+
+_Apitchi na onijishin anamiewin, tchi nita anamiang?_
+
+Apitchi go kitchi onijishin, tchi nita anamiang, ajiwi sa awi Kije
+Manito a ondji gwanwadjiind, gegeti dash jawendagosi awiia gwaiak neta
+anamiad, apitchi gaie o nita jawenimigon aniwi Debendjigenidjin, o
+sagiigon gaie, awiia dash enamiassig kawi o sagiigossin aniwi Jesusan ga
+bi ojitonidjin anamiewin.
+
+_Tani dash ejinikadeg iwi anamiewin aiapitchi onijishing?_
+
+Iwi sa anamiewin, Nosina wakwing ebiian, ijinikade, sasagwana dash
+endasogijigak ta ikitom iwi anamiewin, win sa awi Jesus Christ ki gi bi
+akinoamagona iwi anamiewin wendji onijishing, tchi wi nita ikitong iwi
+ga iji akinoamonang.
+
+_Tani dash ejinikadeg minawa bejig kitchi mino anamiewin ekitowad agiwi
+Catholik ejitwadjig?_
+
+Iwi sa, Kid anamikon Marie, ijinikade, apitchi dash kitchi onijishin
+gaie iwi anamiewin, tchi wi nita ikitowad agiwi enamiadjig awi
+gwanwadjiawad aniwi kitchitwa Mariian neta gaganodamagowadjin, bekish
+gaie awi mamandomawad aniwi wadi jewendagosinidjin, tchi
+gaganodamagowad.
+
+_Onijishin na iwi, tchi nita mamandomang awi kitchitwa Marie, tchi
+gaganodamonang, agiwi gaie wakwing wendji jawendagosidjig, tchi nita
+mamandomangwa wadi, tchi gaganodamagewad kinawi ondji?_
+
+Aninde, kitchi onijishin iwi mojag, tchi wi mamandomangwa agiwi wadi
+wakwing ebidjig, winawa, tchi gaganodamonangwa, winawa sa o wabamawan
+aniwi Kije Maniton neta jawendjigenidjin, o minotagowan dash gego
+geganodamonangwani.
+
+_Tibishko na go kid iji mamandomananig agiwi wakwing ebidjig, iwi dash
+eji mamandomang awi Kije Manito Debendjiged?_
+
+Kawi bapish tibishko kid iji mamandomassinanig agiwi ketchitwa
+wendagosidjig awi Kije Manito eji mamandomang, ki pagosenimana sa win
+awi Kije Manito, tchi mininang kakina gego menesiiang, win dash awi
+kitchitwa Marie, agiwi gaie wadi jewendagosidjig, kid iji mamandomananig
+eta, tchi wi gaganodamonangwa wadi wakwing, tchi jawendagosiiang.
+
+_Ta de jawendagosi na awiia sagaandasodji eta, tchi iji gashkitopa wadi
+wakwing, tchi ijad, gi ashkwa bimadisid aking?_
+
+Kawi de jawendagosissi awiia sagaandasodji eta, wakwing, tchi ijapa,
+bekish sa apitchi go weweni o da wi debwetan Catholik ijitwawin, weweni
+gaie ta dodam iwi eji angwamitagosid awi Kije Manito, eji ginaamaged
+gaie od angwamitagosiwining.
+
+_Tapi dash ga migiwed awi Kije Manito aniwi od angwamitagosiwinan
+medatchininigin?_
+
+Iwi sa ginwenj awi Jesus Christ abwa binagosid aking, gi migiwe awi Kije
+Manito baiejigod od angwamitagosiwinan. Moisan dash o gi anonan, tchi wi
+gagikwenodaminid aniwi angwamitagosiwinan iwipi megwe enamianidjin,
+apitchi dash o gi ganawendamini iwi ga iji gagikwenodawimindwa, nongo
+dash agiwi Catholik mekateogwanaieg enindjig o gagikwenodawawan
+enamianidjin, tchi wi ganawendaminid aniwi angwamitagosiwinan, win sa
+awi Jesus Christ ga inakoniged iwi dinowa.
+
+_Apitchi na inendagosi awi Catholik enamiad, tchi wi midji kikendang
+aniwi angwamitagosiwinan wakwing ga bi ondji migiwengin?_
+
+Aninde, apitchi go angwamima awi enamiad, tchi wi midji kikendamawad
+aniwi Kije Maniton od angwamitagosiwinini, bekish gaie, tchi wi
+ganawendamawad, kawi sa awi Debeniminang anish gego inakonigessi a
+gashkitossig iwi, tchi dodang, gegeti dash matchi dodam awiia, kishpin
+wi babamendansig aniwi angwamitagosiwinan, gaie dash ta kitchi animisi
+wadi, gi ashkwa bimadisid aking, kawi sa o babamitawassin aniwi Kije
+Maniton eji angwamitagosinid, awiia dash wakwatchitod mojag weweni, tchi
+babamendang aniwi angwamitagosininan, od ondji nita jawenimigon aniwi
+Debendjigenidjin, wadi gaie o ga mino bibakonigon, ningoting wakwing,
+tchi pindiged kagini minawanigosiwining.
+
+_Apitchi na matchi dodam awiia enamietawad nibina Kije Maniton?_
+
+Aninde, kitchi matchi dodam ajiwi, ikito sa awi Kije Manito netamising
+odangwamitagosiwining, bejigo Kije Manito misode gego ga gijitod, ki ga
+bejigo gwanwadjia, enigokodeeian ki ga bejigo sagia, ka dash bapish wika
+awiia da wi manitokessi.
+
+_Onijishin na sasagwana anish, tchi ikitong od anosowin awi Kije Manito,
+gaie Jesus Christ Debeniminang?_
+
+Kawi onijishinsino anish, tchi wawindaming iwi anosowin, kid igona sa
+awi Kije Manito eko nijing od angwamitagosiwining, kawi anish Kije
+Manito ki ga wawinassi, kego dash wika anish ta aiossim iwi anosowin
+gego endajindamingi.
+
+_Apitchi na inendagosi awiia enamiad, tchi wi nita gwanwadjitod iwi
+anwebiwinigijigad edaming?_
+
+Apitchi gegeti kitchi angwamima awi enamiad, tchi wi nita gwanwadjitod
+iwi anamie gijigad edaming, ikito sa awi Debendjiged eko nising
+odangwamitagosiwining, Anwebiwinigijigad ki ga wi gwanwadjiton, kego
+dash wika awiia ta dodassi gego ge ondji bwa gwanwadjitod anamiegijigad.
+
+_Kid angwamimigomi na mojag weweni, tchi wi minadenimangwa ki
+nigiigonanig?_
+
+Aninde, apitchi go mojag ki da wi minadenimananig ki nigiigonanig, win
+sa awi Kije Manito kid igona ajiwi eko niwing od angwamitagosiwining,
+kos, kigashi gaie ki ga wi minadenimag, ginwenj, tchi wi bimadisiian
+ajonda aking, apitchi dash kitchi matchi dodam awiia menadenimassig
+onigiigon.
+
+_Ki ginaamagomi na apitchi, tchi wi bwa nisang awiia?_
+
+Apitchi go gegeti ki kitchi ginaamagona iwi, ikito sa awi Debeniminang
+ajiwi eko naning od angwamitagosiwining, kego awiia nisake, ka dash
+bapish wika awiia o da nisassin widji bimadisin, neshiwed sa ta
+banadisi.
+
+_Apitchi na awiia nanaw ejiwebisid o kitchi nishkian aniwi Kije Maniton
+Debendjigenidjin?_
+
+Apitchi go ajiwi od ijiwebisiwining od ondji kitchi nishkian aniwi
+aiapitchi mino ijiwebisinidjin, ikito sa win awi Kije Manito eko
+ningotwatching od angwamitagosiwining, keko nanaw inadisike kispin dash
+potch awiia nanaw ijiwebisid, gegeti ajiwi banadjiidiso, dodam sa iwi ge
+wi bwa dodangiba.
+
+_Tani dash ge wi dodang awiia gego ga gimodidji?_
+
+Papige sa neiab o da wi migiwen iwi ga gimodid, ta wi kopese gaie, ka
+gaie minawa ta wi gimodissi, win sa awi Debeniminang ikito ajiwi eko
+nijwatching od angwamitagosiwining, kego gimodike, ka dash bapish wika
+awiia da wi gimodissi, gemodishkid sa kawi wadi kakini jawendagosiwining
+ta pindigessi.
+
+_Inendagosi na awiia enamiad mojag, tehi wi bwa gaginawishkid?_
+
+Aninde, ka wika ta wi gaginawishkissi, ikito sa awi Kije Manito
+ekoishwatching od angwamitagosiwining, kego gaginawishkike, tchi
+batamadiba awiia, mojag dash awiia ta wi debwe api gego ekitodji.
+
+_Apitchi na ginaamawa awiia Catholik ejitwad mojag, tchi wi bwa matchi
+misawenimad widji bimadisin?_
+
+Apitchi gegeti kitchi ginaamawa iwi dinowa, ikito sa win awi
+Debeniminang ajiwi eko jangatching od angwamitagosiwining, kego
+misawinamawiiege kitchi bimadisi owidigemaganan, weweni dash awiia
+enamiad ta wi nita mino ganawenindiso, mojag gaie win, tchi wi bwa
+misawenimad widj anishinaben, ajiwi sa misawendamowining ondjibamagad
+nanawtowiwin.
+
+_Ajiwi na matchi dodam awiia mesawendamawad widji bimadisin gego
+endaninidji?_
+
+Aninde, ajiwi ondji matchi dodam, ikito sa Kije Manito amidatching
+odangwamitagosiwining, kego gaie misawendamawiiege awiia gego endanidji,
+ka dash wika awiia ta matchi misawendjigessi.
+
+_Inendagosi na awiia enamiad, gaie weweni, tchi wi ganawendang Catholik
+anamiewigamig od angwamitagosiwinan?_
+
+Aninde, gaie apitchi mojag o da wi mino ganawendanan aniwi
+angwamitagosiwinan, win sa awi Jesus Christ Debendjiged o gi minan
+mekateogwanaien gashkiewissiwin wendji gashkitonid ajiwi a nita
+angwamitagosinid Catholik ijitwawining, awiia dash bebamendansig aniwi
+angwamitagosiwinan, ajiwi o kitchi agonetawan aniwi Jesusan ge ondji
+dibakonigodjin.
+
+_Matchi dodam na awiia Catholik ejitwad dasing bwaia gwanwadjitodji
+ananiegijigad, gaie kitchitwa gijigad, iwipi gaie bwaia pindigedji
+anamiewigamigong aj anamesikewinakadinig?_
+
+Apitchi gegeti kitchi matchi dodam awi endodang iwi dinowa, ikitomagad
+sa ajiwi angwamitagosiwining, ki ga gwanwadjitonan kitchitwagijigadon ga
+igongin, tchi wi gwanwadjitong, weweni gaie ki ga anamia epitchi
+anamesikegijigak api enamiegijigaki, dasing gaie ketchitwagijigaki,
+weweni dash da wi pindige anamiewigamigong iwipi ganage awi enamiad,
+tchi wi anamiad epitchi anamesikewinagadinig, bekish gaie, tchi wi
+pisindang anamie gagikwewin, ka gaie iwipi da wi anokissi, minik dash
+eji gashkitong, tchi mino dodaming, ta mino dodam, memindage aj
+anamiegijigak.
+
+_Debise na endaso bibonagak ningoting eta, tchi kopesseng, ningoting
+gaie, eta, tchi wi odapinaming kichitwa Eukaristiwin?_
+
+Kawi gwetch iji debisessino iwi ningoting eta, tchi anwenindisong kabe
+bibon, mi sa a onijishing sasa gwana, tchi jawendagosing, gonima neningo
+gisiswagaki, awashime sa wenipanad, tchi makwendaming batadowinan a nita
+anwenindisong, aniwi dash ikitowinagak ajiwi angwamitagosiwining, weweni
+ki ga webinige ganage ningoting endaso bibonagak, ki ga odapinan gaie
+kitchitwa Eukaristiwin dasing wedjitchisegi Pak, anind sa dash ketchi
+kitimishkidjig aniamiewin ondji, iwi iji angwamimawag kabe bibon ganage
+ningoting, tchi wi anwenindisowad, win dash awi swanganamiad minwendam
+sasagwana a kopesed, tchi jawendagosid.
+
+_Matchi dodam na awiia Catholik ejitwad kishpin midjid wiias a
+tchibaiatigogijigadinig, gaie makatekessig nimidana dasogwan, dasing
+gaie egong, tchi wi makatekeng?_
+
+Aninde, ajiwi matchi dodam awi endodang iwi, ikitowinagad sa ajiwi
+angwamitagosiwining, ki ga makateke nimidana dasogwan abwa odjitchiseg
+Pak, gaie dasing egong awi makatekeng, kego gaie midjike wiias
+atchibaiatigogijigak, gaie a makatekegijigak, weweni dash awi enamiad o
+da wi babamendan gaie iwi angwamitagosiwin.
+
+_Tani dash ge dodaming iwi, tchi makatekeng nimidana dasogwan, gaie
+dasing egong, tchi makatekeng?_
+
+Ningoting sa eta weweni ta wisinim a makatekegijigak, pangi dash eta
+iwipi go, kishpin minawa wisining, ka dash wiias iwipi ta wi midjissim.
+
+_Wegone dash wendji igoiang aiapi, tchi wi makatekeiang, aiapi gaie,
+tchi wi bwamidjiiang wiias?_
+
+Ajiwi sa, tchi iji kotagiidisoiang ki batadowininanin ondji gaie Jesus
+Christ gi makateke nimidana dasogwan, mojag gaie ga ako aiawad aking
+bemadisidjig aiapi gi makatekewag, mi gaie iwi ge ondji makatekeiang
+gaie kinawi.
+
+_Kakina na agiwi enamiadjig inendagosiwag, tchi wi makatekewad api
+mekatekegijigadinigi?_
+
+Kawi apitchi kakina Catholik ejitwadjig inassiwag, tchi wi makatekewad,
+mi sa, abinodjiiag, weshkinigidjig, gaie aiakosidjig, gaie ketchi
+anokidjig, gaie ketchi bimosedjig, gaie gekadjig, gaie akwewag
+gegishkawadjig abinodjiian, nwanawasodjig gaie, anawi dash kawi gaie
+winawa agiwi ajonda waiawinindjig o da wi midjissinawa wiias api
+tchabaiatigogijigadinigi, gaie mekatekegijigadinigi.
+
+_Angwamima na awiia Catholik ejidwad gaie aiapi, tchi wi anamie
+pagidiniged, iwi eji gashkitod?_
+
+Apitehi gegeti angwamima, gaie iwi ge wi babamendangiba, ikitowinagad sa
+ajiwi angwamitagosiwining, gego netawigitoian ki ga anamie pagitinige
+endodamowad, agiwi enamiadjig kishpin dash awi enamiad wi anamie
+pagidinigessig, ajiwi od apitchi agonetan odijitwawin, matchi dodam
+gaie.
+
+_Onijishin na awiia enamiad, tchi widigemad osam besho enawemadjin, gaie
+api genaamadingi, tchi ojitod wikondiwin?_
+
+Kawi gosha onijishinsino iwi, tchi dodang awi Catholik ejitwad, ikitom
+sa ajiwi angwamitagosiwining, kego widigemake osam besho enawemad, kego
+gaie wikongeke api wedjitchisegi a ginaamading iwi, mi sa, nio
+anamiegijigad abwa niba anamie gijigak, nanaj dash, tchi ogimagijigak,
+minawa dash megwa a makatekeng nimidana dasogwan, nanaj dash nitami,
+tchi anamie gijigak gi ashkwa Pakwang, mi iwi apitch bwaia anamie
+nibawing, mi gaie iwipi ge wi bwa wikondingiba, gaie, tchi wi bwa
+nimiiding, kishpin dash awiia enamiad kidwe babamendansig gaie iwi
+angwamitagosiwin, ajiwi dash kitchi matchi dodam, od agonetawan sa aniwi
+Jesusan ga bi ojitonidjin anamiewin.
+
+_Weni dash awi ga bi ojitod kitchitwa Sakreman?_
+
+Win sa awi Jesus Christ o gi bi ojitonan aniwi kitchitwa Sakreman
+edamingin, agi inendang, tchi nita jawendagossiinang ajonda aking, gaie
+wadi wakwing.
+
+_Tani dash ijiwebak iwi bejig Saksema, sigaandadiwin edaming?_
+
+Api sa meno sigaandagoiang, iwipi kakina ki batadowininanin
+gasiigadenon, gaie iwi batadowin bi gaginigiiang, kakina gaie gego ga
+iji bata diiango abwa sigaandasoiang, ajiwi agasiiamagoiang.
+
+_Weni dash awi geshkitod weweni go, tchi mino sigaandaged?_
+
+Awiia sa Catholik maiekateogwanaiewid o gashkiton apitchi gwaiak, tchi
+sigaandawad anishinaben, awiia dash mashi sagaandasossig, kishpin dash
+kitchi agosid, iwipi, tchi nibod, ajiwi dash besho aiassig iwipi awi
+mekateogwanaie, mi dash iwi apitch geshkitod awiia
+maiekateogwanaiewissig, tchi sigaandawad aniwi aiakosinidjin, apitchi
+dash ta babamendam iwi, awiia sa gwaiak sagaandasossig, kawi wadi
+wakwing pindigessi.
+
+_Tani dash ge dodang awiia, tchi sigaandaged, maiekateogwanaiewissig?_
+
+Manda sa ta dodam, nibish o ga siginamawan ondibaning aniwi wa
+sigaandawadjin, bekish dash ta ikito, ki sigaandon od anosowining
+weosimind, gaie wegosimind, gaie Kitchitwa Manito, Apeingi, apitchi dash
+gwaiak ta ikito iwi, bekish gaie ta inendam, nongo go, nin wi mino
+sigaandawa maba.
+
+_Tani dash dasing awiia ge sigaandawindiba?_
+
+Ningoting sa eta awiia weweni ta sigaandawa, awiia dash ge gi
+sigaandagod maiekateogwanaiewissinigon, pama dash o ga anamietagon
+mekateogwanaien anamiewigamigong sigaandadiwin ondji.
+
+_Tani dash ejiwebak iwi bejig Sakrema, songideeshkagewin, edaming?_
+
+Api sa manigoiang songideeshkagewin, iwipi ki pindigagona awi Kitchitwa
+Manito, bekish gaie ki minigona ajiwi o migiwewinan najwatchininigin,
+tchi ondji gashkitoiang gwaiak a wi ijiwebissiiang kid ijitwawininang.
+
+_Weni dash awi geshkitod, tchi migiwed songide eshkagewin?_
+
+Awiia sa ketchi mekateogwanaiewid o migiwen iwi Sakrema.
+
+_Tani dash ge dodang awiia api wa minindji iwi Sakrema?_
+
+Weweni sa iwipi nakawe ta anwenindiso, tchi kopesed, weweni gaie ta
+anamia, gaie manda ana miewin, ta ikito, mi sa, Kije Manito, Nose,
+kidebweton, nin debwetan gaie kakina ga iji anamie akinoamagoia Catholik
+ijitwawining, kid anamikon Kitchitwa Manitowiian, ki biin, tchi
+pindigawiian nindeing awi moshkineshkagoia ki jawendjigewin, ki
+mamakadenimin epitchi nita jawenimiian, minawa ano nishkiina sasagwana a
+bata diia, nongo dash ondjita nind anwenindis minik ga iji bata diia,
+ondjita gaie ki sagiin enigokodeeia, apegish na kagini abi tawiian
+nindeing, apegish gaie iji jawendagosiia awi Jesus Christ ga iji
+gijitainang, Apeingi.
+
+_Tani dash ge dodang awiia gi ashkwa minind songideeshkagewin?_
+
+Ta inendam sa, gegeti nin jawendagos agi minigoia songideeshkagewin, ka
+dash wika nin ga wi onendansin nind anamiewin, mi dash tchi ikitod manda
+anamiewin, kid anamikon Ketchitwa Manitowiian, ki wawiiawamin ga iji
+jawenimiian nongo songideeshkagewin agi minigoia, ki gwanwadjiin
+enigokodeeia, ki mamandomin, tchi jawenimiian wadi kagini wakwing, ichi
+minawanigosiia, ganawenimishin, tchi bwa jagoigoia gego maianadak nind
+inendamowining, jawenimishin, tchi mino bimadisiia, gi niboia dash wadi
+kid ogimawiwining kagini, wishdanakimina, Apeingi.
+
+_Tani dash ejiwebak iwi bejig Sakrema, kopesewin edaming?_
+
+Api sa meno kopeseiango iwipi go ki gasiamagomi ki batadowininanin minik
+ga iji bata diiang aking ga ako bimadisiiang, mi sa iwi eji onijishing
+webinigewin, gegeti dash ta wi nita webinige awi Catholik ejitwad, tchi
+jawenimigod aniwi Kije Manitowinidjin.
+
+_Weni dash awi ga bi ojitod webinigewin?_
+
+Win sa awi Jesus Christ iwi o gi bi ojiton iwipi manda agi inad o
+mekateogwanaieman, mi sa, awegwenidig ge gasiamawawegwe o batadowinan,
+mi awi aniwi gaiasiamawind, awegwenidig dash ge gasiamawassiwawegwe o
+batadowinan, mi awi aniwi gaiasiamawassiwind, gwaiak dash ajiwi
+ondjibamagad kopesewin.
+
+_Wegone dash awi Jesus Christ ga iji minad kakina go Catholik
+mekateogwanaien iwi agi ikitod webinigewin ondji?_
+
+Ajiwi sa o gi iji minan aniwi maiekateogwanaiewinidjin gashkiewisiwin
+wendji gashkitonid weweni, tchi webinamawanid meno kopesenidjin o
+batadowinini, win sa awi Jesus Christ odanosowining a ondji gasiamagenid
+batadowin, gegeti dash ta nita webinigem.
+
+_Wegone dash ge dodang awiia weweni, tchi mino kopesed awi gasiigadenig
+o batadowinan waiebinigedji?_
+
+Manda sa ta dodam awi wa kopesed, weweni ta nanagatawenindiso, gwaiak
+gaie ta anwenindiso, ta inendam gaie, kawi minawa nin ga wi bata dissi,
+kakina gaie minik ga iji bata digid o ga bi windamawan mekateogwanaien
+waiebinigeigodjin, weweni gaie ta kotagiidiso o batadowinan a gi ondji
+nishkiad Debendjigenidjin.
+
+_Wegone dash ge dodang awiia wa webiniged, tchi bwa nanagatawenindisod
+obatadowinan ondji?_
+
+Nakawe sa weweni ta anamia, tchi wi mamandomad Kitchitwa Maniton awi
+wasenamagod, kakina obatadowinan, tchi makwendang minik gego ga bata
+digidji.
+
+_Wegone dash ge dodang awiia wa kopesed weweni, tchi makwendang kakina
+obatatowinan?_
+
+Weweni sa ta nanagatawenindiso minik ga matchi inendang, minik gaie ga
+matchi ikitod, minik gaie ga matchi dodang, kispin gaie gi dodansig gego
+aiangwamitagosingi, tchi wi dodamingiba Catholik ijitwawining, kakina
+dash o datadowinan o da wi nandamakwendanan iwipi epitchi
+nanagatawenindisod awia bwaia kopesedji, mi dash, tchi mino webiniged.
+
+_Apitchi na onijishin iwi weweni, tchi nanagatawenindisong?_
+
+Apitchi gegeti kitchi onijishin, sasagwana, tchi wi nanagatawenindisong,
+memindage dash abwa kopeseng, kishpin sa awiia weweni wi
+nanagatawenindisossig ganage iwipi, ajiwi dash kawi weweni ta
+webinigessi, matchi dodam dash, ka gaie gasiamawassi o batadowinan,
+weweni dash ta nanagatawenindisom kopesewin ondji.
+
+_Wegone dash ge ondji anwenindisod awiia wa webiniged?_
+
+Ta ondji anwenindiso sa, o batatowining agi ondji nishkiad aniwi Kije
+Maniton Neso bejigonidjin, apitchi sa kitchi onijishin iwi
+anwenindisowin Kije Manito ondji anwenindisong, mojag dash win ta ondji
+anwenindisom api waiebinigengi.
+
+_Wegone dash minawa ge dodang awiia wa kopesedji, tchi gasiamagod Kije
+Kije Maniton, minik ga iji matchi ijiwebisid?_
+
+Mekateogwanaien sa o ga nasikawan anamiewigamigong endaji kopeseng,
+nitam dash ajiwi ta ikito, gaganodamawishin Nose, nin kitchi bata
+ijiwebis, mi dash tchibaiatigoniged, tchi ikitod iwi anamiewin, nin
+windamawa Kije Manito, gi ashkwa ikitod dash iwi anamiewin, ta ikito iwi
+ga ako kopesed ashkwatch, mi dash ajiwi owinge, tchi dibadodang o
+batadowinan minik mekwendangin iwipi ga ako webiniged ashkwatch, ondajte
+ga bata digid o ga windamawan aniwi mekateogwanaien waiebinigeigodjin,
+ka dash bapish awiia kwapesedji ondjita ajiwi o da wi kakitossin gego ga
+bata digidji, kishpin sa ondjita ajiwi dibadodansig kakina o
+batadowinan, ka gego gasiamawassi, matchi dodam eta, bekish gaie ajiwi o
+kitchi nishkian Kije Maniton.
+
+_Apitchi na matchi dodam awiia kekitodji ondjita anind obatadowinan a
+dibadodansig api kwapesedji?_
+
+Apitchi go kitchi matchi dodam awi endodang iwi dinowa, kawi sa bapish
+gego ga bata digidji, o ga ondji gasiamagossin aniwi Jesusan ga bi
+ojitonidjin kopesewin, apitchi dash weweni awiia epitchi webinigedji
+kakina o da wi dibadodanan o batadowinan, mi dash, tchi jawenimigod
+aniwi Debendjigenidjin.
+
+_Tani dash ge iji dibadodang awiia obatadowinan megwa a webiniged?_
+
+Ta gigito sa ajiwi weweni, tchi nisitotagod aniwi mekateogwanaien
+waiebinigeigodjin, dasing gaie gego ga matchi dodang ta ikito, ka dash o
+ga wi wawinassin bekanisinidjin, ka gaie bakan gego ajiwi ta
+dibadjimossi, kwapesedji, o batadowinan sa eta ajiwi o da wi
+dibadodanan.
+
+_Tani dash ge dogang awiia gaiasiamagossig mekateogwanaien megwa a
+webiniged?_
+
+Minawa sa ta bi kopese, nasab, tchi dibadodang obatadowinan minik nitam
+ga dibadodangin agi kopesed, mi dash pitchinag, tchi anamietagod aniwi
+mekateogwanaien kwapeseigodjin, kishpin gwaiak anwenindisod, tchi
+bonitod omatchi ijiwebisiwin.
+
+_Wegone dash ge dodang awiia iwipi gi ashkwa webiniged?_
+
+Papige sa ta ikito iwi anamiewin, Kije Manito, Nose, ondjita nind
+anwenindis, gaie dash apitchi go weweni ta ijitchige kotagiidisowin,
+kakina minik ga iji minigod aniwi mekateogwanaien ga webinigeigodjin,
+tchi kotagiidisod agi matchi ijiwebisid.
+
+_Tani dash ejiwebak iwi webinamagowini kotagiidisowin edaming?_
+
+Awiia sa api weweni geshkitamasod iwi jawendagosiwin, iwipi webinamawa
+kotagitowin ga iji wikwatchitamasod aking, tchi animisid, gonima gaie
+wadi gasiakisowining, agi bata ijiwebisid aking, apitchi dash kitchi
+onijishin, gaie iwi webinamagowini kotagiidisowin, wadi ajita
+bimadisiwining, tchi ondji jawendagosing, aiapi sa iwi dago Catholik
+ijitwawining, dasing dash ajiwi endagogi iwi jawendagosiwin, ta
+angwamisi awi enamiad, tchi gashkitamasod.
+
+_Wegone dash ge dodang awiia, tchi gashkitamasod iwi webinamagowini
+kotagiidisowin?_
+
+Manda sa ta dodam iwipi, tchi gashkitamasod iwi ketchi inabadadinig,
+weweni go ta anwenindiso, tchi kopesed, o ga odapinan gaie kitchitwa
+Eukaristiwin, ningoting gaie ta ikito, nin debwetawa Kije Manito,
+nijwatching gaie ta ikito, nosina Wakwing ebiian, nijwatching gaie ta
+ikito, kid anamikon Marie, nijwatching gaie ta ikito, kitchitwawendagosi
+weosimind, mi sa iwi ge dodang awi Catholik ejitwad, tchi gashkitamasod
+iwi webinamagowini kotagiidisowin.
+
+_Weni dash awi geshkitod iwi jawendagosiwin aiapi aj atod ajiwi Catholik
+ijitwawining?_
+
+Win sa awi kitchi mekateogwanaie maiamawi niganisid, aiapi o migiwen iwi
+webinamagowini kotagiidisowin a jawenimad aniwi enamianidjin.
+
+_Tani dasd ejiwebak iwi bejig Sakrema, hitchitwa Eukaristiwin, edaming?_
+
+Win sa awi Jesus Christ o gi aton wiiaw, omiskwim gaie ajiwi
+pagwejiganing od ijinagosiwining, jominabong gaie, ajiwi akakisod eji
+Kije Manitowid, gaie eji anishinabewid, gegeti dash inendagwad, tchi wi
+kitchi gwanwadjitongiba iwi kitchitwa Eukaristiwin.
+
+_Tani dash ga dodang awi Jesus Christ agi ojitod kitchitwa
+Eukaristiwin?_
+
+Iwipi sa ashkwatch agi widopamad o mekateogwanaieman, ajiwi o gi
+odapinan pagwejigan o gi anamietan, gaie o gi bokobiton, gaie iwi o gi
+minan aniwi o mekateogwanaieman agi inad, odapinamog, midjig gaie kakina
+iwi ondji, mi manda niiaw, mi gaie tibisko agi odapinang anamie
+minikwadjigan ajiwi ga ateg jominabo, o gi anamietan, gaie iwi o gi
+minan aniwi omekateogwanaieman agi inad, odapinamog, minikweg gaie
+kakina iwi ondji, mi manda nin miskwin, kinawa ge ondji sigiseg, nibina
+gaie bemadisidjig, tchi bonigitedagowad Kije Maniton, abata
+ijiwebisiwad, mi sa go iwipi awi Debendjiged agi ijitod kitchitwa
+Eukaristiwin.
+
+_Wegone dash ga ikitod awi Jesus Christ ga ashkwa ojitod iwi kitchitwa
+Eukaristiwin?_
+
+Ajiwi sa o gi inan omekateogwanaieman, mi manda ge ni dodameg, apine,
+tchi wi makwenimiieg, mi dash iwipi go gi iji minad omekateogwanaieman,
+gaie kakina Catholik maiekateogwanaiewinidjin gashkiewisiwin wendji
+gashkitonid, gaie winawa, tchi ojitonid kitchitwa Eukaristiwin dasing
+epitchi anamesikenidji, gegeti dash apitchi go mino ijiwebad gaie
+anamesikewin.
+
+_Wegone dash aiawang iwi, anamesikewin, edaming?_
+
+Pagidinigewin sa awan iwi anamesikewin, tibishko sa ga iji
+pagidenindisod tchibaiatigong awi Jesus Christ agi nodjimoad ki
+tchibaminanin, mi gaie tibishko iji pagitenindisod dasing enamesikengi,
+wiiaw sa omiskwin gaie ajiwi od iji pagidendamawan osan Keje
+Manitowinidjin, onindjining aniwi mekateogwanaien enamesikenidjin.
+
+_Apitchi na mino dodam awiia ejad apine endaso gijigadinig
+anamiewigamigong aj anamesikewinagadinig, tchi anamiad?_
+
+Aninde, apitchi go kitchi mino dodam awi neta ijad anamesikewining,
+ajiwi sa od iji kitchi sagian aniwi Jesusan ga bi ojitonidjin iwi
+anamesikewin, bishpin dash bekish mino ijiwebisid Catholik ijitwawining,
+gegeti dash wadi o ga mino dibakonigon aniwi Debendjigenidjin ningoting
+wakwing, tchi pindiged.
+
+_Wegone dash ge dodang awiia ejadji ajiwi epitchi anamesikeng?_
+
+Memindage sa iwipi ta kitchi anamia, ajiwi, tchi wi anamietawad aniwi
+Jesusan bi abinidjin kitchitwa Eukaristiwining, kishpin dash awiia
+endanisidji ajiwi anamesikewining ganage iwipi anamiassig, gegeti dash
+matchi dodam, kawi sa od iji gwanwadjiassin aniwi wakwing
+wendjibanidjin, mojag dash weweni ta anamiam anamiewigamigong.
+
+_Wegone dash wendji debwetamang iwi, a bi abid awi Jesus Christ ajiwi
+kitchitwa Eukaristiwing?_
+
+Win sa awi Debendjiged gi ikito, tchi bi abid aji wi jawendagosiwining,
+ka dash wika ginawishkissi, ka gaie gego o bwanawitossin, tchi dodang,
+mi ma wendji debwetamang gaie iwi dinowa aiapitchi onijishing.
+
+_Wegone dash wedapinamang api jewendagosiiango iwi kitchitwa
+Eukaristiwin ondji?_
+
+Ajiwi sa kid iji odapinana awi Jesus Christ eji Kije Manitowid gaie eji
+anishinabewid, wiiaw, omiskwim gaie, gegeti sa awi Debendjiged abi ajiwi
+pagwejiganing od ijinagosiwining.
+
+_Tani dash eji kitchi jawendagosid awiia meno odpinang iwi kitchi
+jawendagosiwin?_
+
+Iwipi sa wiiawing o gagishkawan aniwi Jesusan ajiwi jawendagosiwinig
+ebinidjin, o songideeshkagon dash eshkam, tchi mino ijiwebisid Catholik
+ijitwawining, eshkam gaie, tchi minwendang sasagwana, tchi kopesed awi
+jawendagosid, mi dash ajiwi ge ondji gashkitod mojag, tchi jagotchitod
+maianadadinig, pama dash gi ashkwa bimadisid aking, wadi ajita
+bimadisiwining ningoting wakwing, tchi odapinigod aniwi
+Debendjigenidjin.
+
+_Wegone dash ge dodang awiia, tchi mino odapinang kitchitwa
+Eukaristiwin?_
+
+Apitchi sa weweni ta anwenindiso, tchi mino kopesed nakawe, tchi bwa
+jawendagosid, iwipi gaie eko abitatibikadinig ka gego o ga midjissin, ka
+gaie ta minikwessi awi wa odapinang kitchitwa Eukaristiwin, apitchi gaie
+o ga bebweieniman aniwi Jesusan bi danisinidjin ajiwi jawendagosiwining,
+kawi gaie awiia wa jawendagosidji o ga wi jingenimassin widji bimadisin,
+iwipi dash memindage ta mino anamia anamiewigamigong, tchi ojitad awi
+mino pindigagod aniwi Debendjigenidjin, iwipi gaie ta kitchi
+tabasenindiso, megwa nasikang iwi endaji jawendagosing.
+
+_Wegone dash ge ikitod awiia wa jawendagosidji iwipi jaigwa wi pasigwid,
+tchi nasikang iwi endaji odapinang kitchitwa Eukaristiwin?_
+
+Manda sa ta ikito nising, Jesus, Nose, kawi nin de apitendagosisi, tchi
+pindigawiian nindeing, ningototon dash eta ikiton, mi tchi nodjimod nin
+tchibam, minawa gaie ta kitchi anwenindiso odeing, tchi songendang
+enigokodeed, tchi sagiad aniwi Jesusan ajiwi wa odapinadjin a bi abinid
+kitchitwa Eukaristiwining, mi dash ajiwi wabishkigin, tchi tesiginang
+onindjing, pangi gaie ta datagikweni, pangi gaie o da nisakonan odon,
+tchi minigod mekateogwanaien kitchitwa Eukaristiwin beka, tchi gondang,
+mi dash, tchi giwed apabiwining wa daji odjitchingwanigabawid weweni,
+tchi migwetchiwenimad aniwi Jesusan ga pindigagodjin ajiwi odeing,
+minawa dash weweni ta anamia, ginwenj gaie iwipi kawi ta sagansi
+anamiewigamigong awiia ga ashkwa jawendagosidji, apitchi sa kitchi
+onijishin ginwenj weweni, tchi anamiang ajiwi ga ashkwa odapinamingi
+kitchitwa Eukaristiwin, kawi dash iwipi osam waiba ta madjassim.
+
+_Weni dash awi metchi odapinang kitchitwa Eukaristiwin?_
+
+Awiia sa ondjita debadodansig kakina o batadowinan waiebinigedji, gonima
+gaie iwipi weweni anwenindisossig, ta owingesi dash awiia kwapesedji,
+weweni ajiwi, tchi dibadodang kakina gego ga iji bata ijiwebisid, iwipi
+gaie enigokodeed ta anwenindiso, mi dash, tchi mino odapinang kitchitwa
+Eukaristiwin, kishpin sa awiia matchi odapinang iwi, o kitchi nishkian
+aniwi Jesusan Debendjigenidjin.
+
+_Apitchi na inabadad sasagwana, tchi kopeseng, sasagwana gaie, tchi
+odapinaming hitchitwa Eukaristiwin?_
+
+Aninde, apitchi kitchi inabadad iwi sasagwana, tchi jawendagosing, awiia
+sa endodang iwi, gegeti kija ojita ningoting, tchi mino nibod, mi dash
+wadi gaie ningoting, tchi pindiged wakwing.
+
+_Weni dash awi manind iwi bejig Sakrema, anamie nominidiwin,
+ejinikadaming?_
+
+Awiia sa ketchi akosidji ajiwi meno ijiwebisid Catholik ijitwawining
+mina iwi jawendagosiwin, api nenisanisid, tchi nibod.
+
+_Wegone dash manigosid awi aiakosid api enamie nominindji?_
+
+Ajiwi sa o minigon Kije Maniton o jawendjigewinini, beka, tchi
+kotagendang iwipi epitchi akosid, ajiwi gaie songideeshkawa awi
+aiakosid, tchi jagoiad aniwi matchi Maniton metchi gagwedibenimigodjin,
+naningotinong gaie aiakosid ajiwi od ondji nodjimoigon iwi aj anamie
+nominind, gegeti dash api ketchi akosingi ta pagosendam, tchi minigong
+anamie nominidiwin ondji awi Jesus Christ Debendjiged.
+
+_Tani dash ge dodang awiia aiakosid, tchi mino anamie nominind?_
+
+Nakawe sa gwaiak ta anwenindiso, tchi kopesed, apine gaie o da wi
+apenimonan Kije Maniton wa jawenimigodjin awi jawendagosid.
+
+_Tani dash dasing ge gashkitopa awiia, tchi anamie nominind?_
+
+Ningoting sa eta awiia aiakosid ta mina iwi, kishpin bejigwanong iji
+akosid, nodjimod dash, minawa dash akosid, mi dash minawa, tchi anamie
+nominigod mekateogwanaien.
+
+_Tani dash ge ijiwebisid awiia wa odapinang iwi bejig Sakrema,
+mekateogwanaiewiwin ejinikadaming?_
+
+Apitchi sa ta mino ijiwebisi awiia wa mekateogwanaiewid, apitchi gaie
+weweni ta akinoamawa, owinge, tchi kikendang Catholik ijitwawin
+ejiwebadinig, anind gaie bakan inwewinan o da wi kikendanan inendagosi
+gaie weweni, tchi mino kikendasowininiwid, memindage dash anamiewin
+ondji, bekish gaie o da wi akinawabaman aniwi Jesusan ga iji mino anamie
+akinoamagenidjin iwipi agi bi danisinid aking eji aniniwinid.
+
+_Wegone dash eji minindwa agiwi wedapinangig mekateogwanaiewiwin?_
+
+Ajiwi sa minawag gashkiewisiwin wendji gashkitowad, tchi anamesikewad,
+gwaiak gaie, tchi windamagewad Catholik ijitwawining endaji
+gagikwenodawawad Jesusan od ikitowinini, mi gaie ajiwi a ondji
+gashkitowad, tchi gasiamagewad batadowinan kwapesengi, ajiwi gaie ondji
+gashkitowag gwaiak, tchi dodamowad kakina go gego ge wi mino
+ijitchigewad o mekateogwanaiewiwiniwang ondji aniwi Kije Maniton
+Nesobejigonidjin.
+
+_Matchi dodam na awiia menadenimassig aniwi Catholik mekateogwanaien?_
+
+Aninde, ajiwi kitchi matchi dodam, win sa awi Jesus Christ Keje
+Manitowid od inan aniwi mekateogwanaien enonadjin, awiia
+neshiwanasomineg, win nin nishiwanasomig, mojag dash ganage win awi
+Catholik ejitwad o da wi babamitawan o mekateogwanaieman
+genawenimigodjin anamiewining awi ondji jawendagosiigod.
+
+_Tani dash ge iji wabandaiweian ajiwi kitchi mekateogwanaieg eji
+asigowad aniwi meno manitowinidjin?_
+
+Manda sa ijibiigadeni omisinaiganiwang agiwi Apostleg, wi angwamiidisog,
+gaie agiwi wekwinidjig, ajiwi ga ondji asineg awi Kitchitwa Manito,
+kinawa ketchi mekateogwanaiewiieg, tchi wi nikanisikandameg
+odanamiewigamig awi Kije Manito, iwi ga gishpinatod tibinawe omiskwim
+ondji.
+
+_Tani dash ge iji wabandaweian apitchi mijisha eji kitchi
+niganisikandang anamiewigamig aking awi maiamawi niganisid kitchi
+mekateogwanaie naiabishkawad kichitwa Pieran Roming eiad?_
+
+Manda sa ijibiigadeni omisinaiganing awi kitchitwa Mathiw, kin ma Piere
+kid aw, ajiwi dash iwi wagidajibikowang nin ga ondji ojisiton
+nindanamiewigamig, gaie dash ki wi minin aniwi Wakwing daji
+kitabikaiganan, wegotogwendig dash ge ijitchigewane aking, mi go iwi ge
+ijitchigeng gaie wakwing, mi sa awi Piere apitchi nitam ga mamawi
+niganisid kitchi mekateogwanaie iwi ga iji igod aniwi Jesusan
+Debendjigenidjin, gaie manda ogi igon, mojag igo apine ki wi nadamonim
+gaie bekish ki wi widjaiawinim nanash igo bi ashkwa akiwang iwi ge ondji
+gashkitoieg mojag weweni tchi mino ijitchigeieg Catholik ijitwawining
+iwi ga ojitong wakwi ondji.
+
+_Wegone dash eji minindwa agiwi wedapinangig iwi bejig Sakrema, anamie
+widigendiwin ejinikadaming?_
+
+Ajiwi sa o minigowan Kije Maniton o jawendjigewinini, mojag, tchi wi
+mino sagiidiwad, mojag gaie mamawi, tchi wi mino ijiwebisiwad agiwi
+wadigendidjig, weweni gaie, tchi wi mino nitawigiawad onidjanisiwan
+Catholik ijitwawining, inendagosiwag gaie gwaiak, tchi wi akinoamawawad
+onidjanisiwan, tchi nita ikitonid anamiewin.
+
+_Weni dash awi geshkitod gwaiak, tchi anamie nibawiad aniwi
+enamianidjin?_
+
+Win sa eta awi Catholik mekateogwanaie enind o da ojiton iwi anamie
+nibawiwin, win sa od anonigon aniwi Jesusan Debendjigenidjin, kitchitwa
+Sakreman, tchi minad enamianidjin, kawi dash bakan ta wi ijitchigessim
+widigendiwin ondji.
+
+_Apitchi na ginaamawawag enamiadjig, tchi wi bwa aiowad dibakonigewin,
+nabawiwadji?_
+
+Aninde, apitchi go kitchi ginaamawawag iwi, tchi wi bwa dodamowad, agiwi
+sa Catholik ejitwadjig kidwe debakonigewigabawidjig ajiwi ondji tanasa,
+sagidjiwebinidisowag Catholik ijitwawining, ka dash bapish awi enamiad
+da wi dibakonigewigabawissi api wa widigedji.
+
+_Wegone dash ge dodamowad agiwi wa widigendidjig nakawe, tchi bwa mashi
+anamie nibawiwad?_
+
+Nakawe sa ta anwenindisowag weweni, tchi kopesewad iwipi, tchi bwa
+anamie nibawiwad, weweni gaie o da wi pagosenimawan, Kije Maniton, tchi
+mashkawendamiigowad mojag awi ni mino ijiwebisiwad ajiwi
+widigendiwining.
+
+_Angwamimawag na agiwi enamie nibawidjig kagini mamawi, tchi wi aiawad
+minik ge bimadisiwagwe aking?_
+
+Apitchi gegeti kitchi angwamimawag iwi, apitchi gaie inendagosiwag agiwi
+wadigendidjig apine mamawi, tchi wi aiawad aking epitchi bimadisiwad,
+kishpin dash bakeidiwad, kitchi matchi dodamog, kego dash bapish wika ta
+bakeidissiwag agiwi wadigendidjig.
+
+_Wegone dash iwi batadowin edaming?_
+
+Batadowin sa ijinikadam, kishpin awiia gego endodansigi, awi Kiji Manito
+eji angwamitagosid, tchi wi dodamingiba, gonima gaie gego endodangi, awi
+Kije Manito eji ginaamaged, tchi wi bwa dodamingiba.
+
+_Tani dash endaswaiagak iwi eji bata digid awi anishinabe?_
+
+Niwaiagad sa iwi, metchi inendangi, gaie metchi ikitodji, gaie metchi
+dodangi, api gaie aiano makangi, tchi mino dodang, potch dash mino
+dodansig, apitchi dash ta mino ganawenindiso awi bemadisid, ondjita,
+tchi wi bwa pangishing kitchi batadowining.
+
+_Tani dash eji anigaigoiang kitchi batadowin?_
+
+Kishpin sa kitchi bata diiang, mi iwi apitch benadjitamawang awi Kije
+Manito o jawendjigewin maninang sigaandadiwining, mi gaie eji
+wikwatchitamasoiang anamakamig, tchi apaginigoiang, ka dash wika ki da
+kitchi bata dissimi, sasagwana dash ki da wi webinigemi.
+
+_Tani dash eji anigaigoiang batadowinens?_
+
+Ajiwi sa batadowinensing, kishpin pangishinang, ki ga ondji animisimi
+wadi gasiakisowining, mojag dash ki da angwamisimi gaie, tchi wi bwa
+pangishinang ajiwi batadowinensing.
+
+_Nijwaswi nibowini batadowinan._
+
+Maminadisiwin, Sasagisiwin, Nanawtowiwin, Kijawenindiwin, Nibadisiwin,
+Nishkadisiwin, Kitimiwin.
+
+_Ningotwaswi batadowinan wendji nishkiind awi Kitchitwa Manito._
+
+Awiia osam apenimod aniwi Kije Maniton eji kijewadisinid, Awiia osam
+pangi apenimod aniwi Kije Maniton aiano nita jawendjigenid, Awiia
+ondjita agonetang debwewin aiano kikendang debwewinagadinig, awiia
+ondjita gagawenimad widji bimadisin, awi Kije Manito, o jawendjigewin
+wendji gagawenimad, Awiia ondjita batadowining daji bimadisid, Awiia
+wika anwenindisossig binij nibod.
+
+_Niwin batadowinin babagimagakin wakwing awi ajitawaiding._
+
+Awiia ondjita nisad widji bimadisin, Sodomi batadowin, Awiia ondjita
+waiejimad ketimagisinidjin, gaie jagawinidjin, gaie gawisinidjin, Awiia
+gwaiak dibaamawassig enonadjin, tchi anokinid.
+
+_Shangaswi batadowinan, bekanisidjig o batadowiniwang wendji
+odisigongin._
+
+Awiia a gagansomind awi bata digid, Awiia aj agwamimind, tchi bata
+dodang, Awiia a minwenimind awi bata digid, Awiia a gagandjinaweind
+binij, tchi wi batadodamoind, Awiia a owinwanind awi bata digid, Awiia a
+kakinind agi bata dodang, Awiia a nadamawind, tchi bata digid, Awiia
+bwaia nanibikimindji, gaie bwaia bajanjeondji a bata ijiwebisid, Awiia a
+mino dodawind, tchi bata digid.
+
+_Nijwaswi mino dodamowinan makadimagakin kitchi batadowinan._
+
+Tabasenindisowin, Kijadisiwin, Binisiwin, Mino sagiidiwin,
+Dibamenimowin, Bekadisiwin, Minwewisiwin.
+
+_Niswi od apitchi mino ijiwebiswinan awi enamienibwakad._
+
+Debweiendamowin, Apenimowin, Sagiiwewin.
+
+_Niswi apitchi kitchi mino dodamowinan._
+
+Anamiewin, makatekewin, jajawendjigewin.
+
+_Nijwaswi mino dodamowinan eji mino dodawind awiia eji owiiawid._
+
+Aj ashamindwa bekadedjig, Aminaindwa gaiaskanabagwedjig, Apindiganindwa
+wigiwaming bebamadisidjig, Aj agwiindwa pengwashagididjig,
+Anibwadjiindwa aiakosidjig, Apagidenimindwa nebodjig.
+
+_Nijwaswi mino dodamowinan eji mino dodawind awiia eji otchibamid._
+
+Weweni aj anwenimindwa baiata didjig, Amino akinoamawindwa gego
+kekendansigog, Agagikimindwa kekendassigog gego wa mino dodamowadji,
+Agagisomindwa ketchi ashkendangig, Abeka odapinamawindwa gego meno
+dodagessigog, Aponigitepawindwa neshkiiwedjig, Agaganodamawindwa
+bemadisidjig, gaie nebodjig.
+
+_Niswi minwadjimowini gagikindiwinan._
+
+Ondjita go aminwendaming awi kitimagising, Kagini ondjita go a
+pishishigosing binisiwining, Apine go apagidenindisong, ondjita, tchi
+babamitawindwa enamie niganisidjig.
+
+_Ishwaswi kitchi jawendagosiwinan._
+
+Jawendagosiwag ketimagisidjig otchibamiwang, mi sa agiwi wedaimidjig
+ogimawiwin wakwing, Jawendagosiwag menodeedjig, mi sa agiwi aki ge
+dibendangig, Jawendagosiwag eshkendangig agi bata ijiwebisiwad, mi sa
+agiwi ge minawanigwendangig, Jawendagosiwag bekadenodangig, gaie
+gaiaskanabagwenodangig gwaiakobimadisiwin, mi sa agiwi ge debiindjig,
+Jawendagosiwag neta jawendjigedjig, mi sa agiwi ge jawenimindjig,
+Jawendagosiwag banideedjig, mi sa agiwi ge wabamadjig Kije Maniton,
+Jawendagosiwag baiekadisidjig, mi sa agiwi, onidjanisan awi Kije Manito,
+ge inindjig, Jawendagosiwag gwaiak ijiwebisiwin wendji kotagiindjig, mi
+sa agiwi ge odapinangig ogimawiwin wakwi.
+
+_Nijwaswi o migiwewinan awi Kitchitwa Manito._
+
+Gagitawendamowin, Nibwakawin, Gagansondiwin, Songideewin, Kikendasowin,
+Songanamiawin, Gwaiak segendamowin.
+
+_Midaswi ashi nij omino nitawigidjiganan awi meno Manitowid._
+
+Sagiiwewin, Minawanigosiwin, Bisaniiwewin, Bekadendagosiwin,
+Kijewadisiwin, Jajawendjigewin, Minwadendamowin, Minodeewin,
+Debweiendamowin, Tabasenindisowin, Nibwaka ijiwebisiwin, Binisiwin.
+
+_Niwin aiain ashkwatch ge bi aiamagakin ondji awi anishinabe._
+
+Nibowin, Dibakonigewin, Anamakamig, Wakwi.
+
+_Onijishin na sasagwana, tchi wi nanagatawendaming aniwi aiain ashkwatch
+ge bi aiamagakin?_
+
+Aninde, apitchi go onijishin iwi nanagatawendamowin, ajiwi sa ki
+gagansomigona, memindage mojag, tchi wi mino ganawenindisoiang aking
+epitchi bimadisiiang awi jawendagosiiang ningoting wadi wakwing.
+
+_Mi na go eji debisenig enamiad tchi ojindang eta kakina badadowinan?_
+
+Kawi iji debisessinini enamiad tchi ojindang eta kakina batadowinan,
+apitchi sa kitchi nandawendagosiwag enamiadjig tchi wi mino dodamowad
+minik eji gashkitowad.
+
+_O da gashkiton na awiia tchi mino dodang, win igo enendang?_
+
+Kawi sa awiia o da gashkidossin tchi mino dodang, tchi mino ijiwebisid
+gaie, win igo enendang, win sa Debendjiged Kije Manito ki minigona o
+jawendjigewin, mi dash iwi eta wendji gashkitoiang tchi mino inendamang,
+tchi mino ijiwebisiiang gaie, mi dash enamiad mojag ge ondji
+nandotamawad Kije Maniton tchi minigod jawendjigewin.
+
+_Tani dash enamiad ge iji sagiad nesobejigonidjin Kije Maniton, widji
+bimadisin gaie?_
+
+Nesobejigonidjin Kije Maniton sa o ga wi sagian enigekodeed, eji
+sagiidisod dash o ga iji sagian kakina widji bimadisin, eji minwendang
+sa awiia tchi dodawind, mi iwi ge dodawad gaie win, widji bimadisin, eji
+minwendansig dash awiia tchi dodawind, kawi gaie win, iwi, o ga
+dodawassin widji bimadisin.
+
+_Minwendam na Kije Manito Debendjiged Jesus, enamiad mojag tehi mino
+dodawad widji bimadisin?_
+
+Apitchi sa minwendam iwi, gi ikito sa, minik ge dodawad awiia widji
+bimadisin, nin igo, nin ga dodag.
+
+_Weni dash aiawid kidji bimadisina?_
+
+Kakina sa bemadisidjig enigokwag aki eiadjig awiwag kitchi
+bimadisinanig.
+
+_Matchi dodamog na kwiwisensag, akwesensag gaie ijassigwa
+anamiewigamigong tchi pisindamowad gagikwewin, anamie akinoamagewin
+gaie?_
+
+Apitchi sa matchi dodamog, kishpin ondjita ijassigwa, ajiwi, tchi
+akinoamawindwa anamiewin, apitchi sa inendagosiwag gaie winawa, tchi wi
+nita ijawad Catholik anamiewigamigong endaji anamesikeng enamie
+akinoamageng gaie.
+
+_Tani dash ge dodang enamiad tchi agindang anamieminan?_
+
+Mi sa ge dodang wa agindang anamieminan, nitam ta tchibaiatigonige, mi
+dash tchi ikitod iwi anamiewin, nin debwetawa Kije Manito, gi ashkwa
+ikitod dash iwi anamiewin, ta ikito, ningoting, Nosina wakwing ebiian,
+nising dash ta ikito, mi sa.
+
+Kid anamikon Marie, mwashkineshkagoian jawendjigewin, Debendjiged ki
+widjiwig, Awashime ki kitchitwawendagos endatchiwad akwewag,
+kitchitwawendagosi gaie ga gagishkawad Jesus, magiwed eshkam nibina
+gwaiak debweiendamowin, Kitchitwa Marie, wegashimik Kije Manito,
+gaganodamawishinang abata ijiwebisiiang, nongo, gaie api ge niboiang,
+Apeingi.
+
+Kid anamikon Marie . . . . .
+
+Binij tchi ikitod, Jesus, da ikito manda, magiwed eshkam nibina songan
+pagosendamowin, Kitchitwa Marie . . . . . .
+
+Kid anamikon Marie . . . . . .
+
+Binij tchi ikitod, Jesus, da ikito manda, magiwed eshkam nibina
+beskaneg sagiiwewin, Kitchitwa Marie . . . . . .
+
+Gi ashkwa ikitod dash iwi, ta ikito, Kitchitwawendagosi Weosimind, gaie
+Wegosimind, gaie Wenijishid Manito, Epitchi kitchitwawendagosigobane
+gaiat gaie nongo, kagini gaie kagigekamig, Apeingi. Minawa dash ta
+ikito, Nosina Wakwing ebiian, midatching dash ta ikito, Kid anamikon
+Marie, mwashkineshkagoian jawendjigewin, Debandjiged ki widjiwig,
+Awashime ki kitchitwawendagos endatchiwad akwewag, kitchitwawendagosi,
+gaie ga gagishgawad, Jesus, ta ikito, manda, Ga abwesod miskwi, kinawi
+ondji, gonima ta ikito meshkwat, Ga abitchibad, gonima gaie ta ikito
+meshkwat, Kin, gagangowiian, ga gagishkawad, ondji, Wenijishid Manito,
+Kitchitwa Marie, wegashimik Kije Manito, gaganodamawishinang abata
+ijiwebisiiang, nongo, gaie api ge niboiang, Apeingi, gi ashkwa anamiad
+dash midatching, Kid anamikon Marie, ta ikito Kitchitwawendagosi . . . .
+. .
+
+Minawa dash ta ikito, Nosina wakwing ebiian, midatching dash ta ikito,
+Kid anamikon Marie . . . . . .
+
+Dasing dash ga ashkwa ikitod, Jesus, ta ikito, ga bashanjeond, kinawi
+ondji, gonima meshkwat ta ikito, ga ijad wakwing, gonima gaie meshkwat
+ta ikito, Kin gagangowiian, ga gagishkawad agi nibwatchiad Elisabeth, gi
+ashkwa anamiad dash midatching, Kid anamikon Marie, ta ikito
+Kitchitwawendagosi . . . . . .
+
+Minawa dash ta ikito, Nosina wakwing ebiian, midatching dash ta ikito,
+Kid anamikon Marie . . . . . . Dasing dash ga ashkwa ikitod, Jesus, ta
+ikito, ga basikwebinind minesagawanjin, kinawi ondji, gonima meshkwat ta
+ikito, ga bi ininajawad Wenijishinidjin Maniton, gonima gaie meshkwad ta
+ikito, Kin gagangowiian, ga onidjanisimad, gi ashkwa anamiad dash
+midatching, Kid anamikon Marie, ta ikito Kitchitwawendagosi . . . . . .
+
+Minawa dash ta ikito, Nosina Wakwing ebiian, midatching dash ta ikito,
+Kid anamikon Marie . . . . . .
+
+Dasing dash ga ashkwa ikitod, Jesus, ta ikito ga biminiganad
+kwesigwaninidjin o tchibaiatigoman, kinawi ondji, gonima meshkwat ta
+ikito, ga odapinik wakwing, gonima gaie meshkwat ta ikito, Kin
+gagangowiian, ga pagidinad anamiewigamigong, gi ashkwa anamiad dash
+midatching, Kid anamikon Marie, ta ikito, Kitchitwawendagosi . . . . . .
+
+Minawa dash ta ikito, Nosina wakwing ebiian, midatching dash gaie ta
+ikito, Kid anamikon Marie . . . . . .
+
+Dasing dash ga ashkwa ikitod, Jesus, ta ikito, ga batakakwaond
+tchibaiatigong, kinawi ondji, gonima meshkwat ta ikito, ga ogimakwewiik
+wakwing, gonima gaie meshkwat ta ikito, Kin gagangowiian, ga makawad
+anamiewigamigong, gi ashkwa anamiad dash midatching, Kid anamikon Marie,
+ta ikito, Kitchitwawendagosi . . . . . .
+
+Minawa dash ashkwatch ta ikito, Nosina wakwing ebiian, Kid anamikon
+Marie gaie, ta ikito gaie.
+
+Apegish Kije Manito jawenimad gasiiakisowining ebinidjin, ashkwatch dash
+ta ikito manda anamiewin, (memorare) edaming.
+
+Kitchitwa Marie, gagangowiian, neta jaweningeian, makwendan, ka wika,
+gi iji nondasim, tchi gi agonetawad awiia ga mamandomiki tchi
+gaganodamawad, gagangowiian maiamawi niganisiian, wegashimina, nin gaie,
+aiano kitchi bata diia, eji apenimoia kiiaw, ki bi nadjinijimin, ki bi
+nasikon aj ashkendama agi bata diia, ki bi otchitchingwanigabawiton,
+Jesus wegosimad, kego webinange eji mamandomina, jawendamitawishin gaie
+gaganodamawishin.
+
+Jesus, shawenimishinang.
+
+Jesus, shawenimishinang.
+
+Jesus, shawenimishinang.
+
+Kitchitwa Marie, gaganodamawishinang.
+
+Kitchitwa Joseph, gaganodamawishinang.
+
+Ketchitwawendagosiieg, wakwing, gaganodamawishinang, Apeingi.
+
+
+
+
+MI ANONDA AIAWANGIN JESUS OD IKITOWINAN.
+
+Abinodjiidig, gwanwadjiig genaweniminegog, minik eji gagikiminegwa
+pisindamog, winawa ma ki ganawendamagowag wa iji pagidinamaweg Kije
+Manito ki tchibamiwan, winawa o ga gagwedjimigowan Kije Maniton, ge gi
+ijiwebisiieg aking, Awi neshkimassiwind aianwenimindji, mi awi meno
+inadisid, awi dash jangitang gagikindiwin, mi awi metchi inadisid, awi
+pesindang Kije Manito od ikitowin, mi awi ge nodjimoad o tchibaman, awi
+dash jangitang anamie gagikwewin, mi awi ge banadjiad, Ninidjanisidig,
+pisindawig nebwakad eji gagikimineg, Apitchi gaie minadenimig gegadjig,
+Awi wasokawad meno ijiwebisinidjin, gaie win mino ijiwebisi, awi dash
+wasokawad metchi ijiwebisinidjin, mi go gaie win eni ijiwebisid,
+Memeshkwat jawenindig, eji jaweniminang Debeniminang Kije Manito, Kego
+wisokawakego metchi inadisidjig, ojindamog osamidonowin, kego gaie awiia
+dajimakego, Baiata didjig kawi o sagiigossiwan Kije Maniton, ojindamog
+maianadak, odapinamog wenijishing, amamie gagikindig memeshkwat, Neta
+bata didjig manisiwinisin o dibenimigowan, awi dash Kije Maniton
+saiagiad kawi nita bata dissi, Keko awiia jingenimakego, mojag dash mino
+sagiidig, kishpin awiia ashpendang wiiaw, ta tabasentagosi, awiia dash
+tebasenintisodji, ta ashpendagosi, Abinodji ga mino nitawigid, mi go eni
+mino enadisid ketchi anishinabewidji, makwendamog iwi, Kije Manito tchi
+gagwedjimineg gi ashkwa bimadisiieg, aking ge gi iji inadisiieg, win ma
+Debendjiged Jesus ki gi iji windamagona iwi, enigokodeeieg ki ga sagiawa
+Kije Manito nesobejigod, kidji bimadisiwag dash ki ga iji sagiawag eji
+sagiidisoieg, ki ga iji mino dodawawag gaie eji minwendameg tchi mino
+dodagoieg, Apeingi.
+
+
+
+
+ANAMIEWIN EKITONG TCHI BWA ANAMESIKEWINAGAK.
+
+Kije Manito nose, jawenimishin tchi anwenindisoia, weweni gaie tchi
+anamiaia epitch anamesikewinagak, gasiamawishin nin bata ijiwebisiwin,
+tchi gashkitoia weweni tchi wawiiawamina minik meno dodawiian gaie nin
+aiano nishkiina, Apeingi.
+
+
+
+
+ANAMIEWIN EKITONG AWEBI ANAMESIKEWINAGAK.
+
+Kije Manito Nose, nin kitchi bata ijiwebis, kawi ganage nin de
+apitendagosissi tchi inabiia wakwing, kawi gaie ganage tchi
+ganawabandama endaji anamesikeng, tchi gwanwadjiina, ki mamandomin dash
+tchi bonigidatawiian, tchi mijiian gaie ki jawendjigewin, ga onadjitoia
+agi bata diia, Apeingi.
+
+
+
+
+ANAMIEWIN EKITONG API PESIGWING.
+
+Mi nongo wabandang mekateogwanaie Jesus od ikitowin, apitchi nin
+gijendam gwaiak tchi dodama kakina minik Jesus ga bi iji akinoamonang,
+awashime nin da minwendam tchi nisigoia, iwi dash tchi nagadamamba Jesus
+od ijitwawin, Catholik, edaming, Apeingi.
+
+
+
+
+ANAMIEWIN EKITONG GA, ASHKWA KOPESENGI.
+
+Debenimiian, gego dodawishike ga iji wikwatchitasoia agi bata diia, kego
+gaie makwendange gaiat nin matchi ijiwebisiwin, Kin Keje Manitowiian, ki
+kitchitwa anosowin ondji jawenimishin, nin matchi ijiwebisiwin
+gasiamawishin, Jesus nose, ki gi inag ki mekateogwanaiemag, "Awegwenitig
+ge gasiamawegwe o batadowinan, mi awi ge gasiigadenig, awegwendig dash
+ge gasiamawassiwegwe o batadowinan, kawi ta gasiigadessininiwan," nind
+apitchi apenimon kiiaw, apitchi nin debweiendam agi gasiigadeg nin
+batadowinan nongo api enamietamawid mekateogwanaie, enigokodeeia ki
+wawiiawamin, Jesus ketchi kijewadisiian, agi kitchi bata diiamba nin gi
+iji wikwatchitasonaba, anamakamig, tchi danakisoiamba, nongo dash ki gi
+bonigidetaw, nin matchi ijiwebisiwin, agi kopeseia, apitchi sa gegeti ki
+wawiiawamin anita jawenimiian, Apeingi.
+
+
+
+
+ANAMIEWIN EKITONG ABWA KOPESENG.
+
+Kije Manito nose, pabige go kid iji minwendam tchi migiweian ki
+jawendjigewin, tchi bonigidetawadwa gaie baiata didjig, kishpin weweni
+anwenindisowad, jawendamiganawabamishin, nin gi kitchi bata ijiwebis,
+kitchi sasagwana ki gi nishkiin, anawi dash enigokodeeia nind
+anwenindis, mi wendji pagosenimina tchi gasiamawiian kakina nin
+batatowinan, wasseiendamiishin, weweni kakina tchi makwendama ga iji
+bata diia, mashkawendamiishin, tchi jingendama kakina nin batadowinan,
+kawi gego tchi iji jingendansiwa, eji jingendama kakina maianadak,
+widokawenimishin, apitchi gwaiak tchi wi kikendama kakina nin
+batadowinan, awi mino kopeseia, makawamishin minik ga iji matchi
+ijitchigeia, minik gaie ga ano makama tchi mino dodama, gi dodansiwa
+dash, kikendamoishin gaie dasing ga iji nishkiinowane, Apeingi.
+
+
+
+
+ANAMIEWIN EKITONG ABWA ODAPINAMING KITCHITWA EUKARISTIWIN.
+
+Jesus Debenimiian, aiano bwa wabamina, ondjita dash kid indanenimin
+kitchitwa Eukaristiwining, mi wendji gwanwadjiina awi kitchi sagiina,
+Jesus nose, ki wawiiawamin agi pindigawiian nindeing, agi odapinama
+kitchitwa Eukaristiwin, ka wika nin ga onendansin eji mino dodawiian,
+Jesus, Debendaman nin bimadisiwin, ki pagidinamon niiaw gaie nin
+tchibam, dibendan ge dowane gaie minik ge kogatitowane, wakwing tchi
+minawasiia, Jesus Debenimiian, ondjita gegeti, ki sagiigos, ondjita ki
+sagiin enigokodeeia, nadamawishin, eshkam tchi wi sagiina, Jesus, ki
+nandodamon mino ijiwebisiwin, ki jawendjigewin gaie, mashkawendamiishin,
+tchi wika onendansiwa eji anamia, gaie kin eta tchi akinowabamina,
+apitchi nin pagidenima manisiwinisi, apitchi gaie nin jingendan
+maianadak, jawenimishin, Kije Manito nose, tchi nita jawendagosiia,
+Apeingi.
+
+
+
+
+ANAMIEWIN WENDJI IKITONG BEMADISIDJIG, NEBODJIG GAIE.
+
+Kije Manito nosina, ki pagoseniminimi, tchi jawenimadwa naganisidjig,
+nin mekateogwanaieminanig, kakina gaie debenimiiamindjig, jawenim gaie
+saiagiiamindjig, kakina gaie jangenimiiamindjig, jawenim gaie baiata
+ijiwebisidjig tchi anwenindisowad, gwaiak tchi inadisiwad, mi dash
+wakwing kagini tchi jawendagosiwad, ki pagoseniminimi gaie, tchi
+jawenimadwa aiakosidjig, weweni tchi wi odapinamowad od akosiwiniwan,
+kakina gaie nongo ge nibodjig aking, tchi mino nibowad wakwing tchi
+ijawad, jawenim gaie, kakina gasiiakisowining ebidjig, waiba odapin
+wakwing, kagini wadibi tchi wabamikwa kid ogimawiwining, kitimagenim
+gaie enamiassigog, mij mino inendamowin, tchi odapinamowad Catholik
+ijitwawin, tchi mino inabadjito wad, mi dash tchi jawendagosiwad,
+Debenimiiang, apegish na jawenimadwa kakina agiwi geganodamawangidjig,
+Apeingi.
+
+
+
+
+ANAMIEWIN EKITONG GA ASHKWA ANAMESIKEWINAGAKI.
+
+Kije Manito Debenimiiang, ki wawiiawamin ga iji jawenimiian agi bi ijaia
+endaji anamesikeng, aiano apitendagosissiwa, bonigidetawishin, kishpin
+weweni gi anamiassiwa, nongo agi anamesikewinagak, ondjita nin gijendam
+mojag weweni tchi anamiaia dasing ejaiani endaji anamesikeng,
+jawenimishin, gaie mashkawendamiishin, tchi kitchi mino ijiwebisiia
+Catholik ijitwawining binish niboia, mi dash ge odapiniian Wakwing,
+Apeingi.
+
+
+
+
+ANAMIEWIN EKITONG DASING KEGIJEBAWAGAKI.
+
+Misode gego netawitoian Kije Manito egoian, kin gegeti apitchi
+debenimiiang, kid apitchi wawiiawaminimi agi ganawenimiiang tibikong,
+kagini jawenimishinang, kagini ki ga babamitonimi ge ako bimadisiwange
+aking, nadamawishinang, tchi nibwakaiang minik ejitchigeiang kid
+ijitwawininang, mi dash wakwing tchi dagwishimiiang, gi niboiang aking,
+Apeingi.
+
+
+
+
+ANAMIEWIN EKITONG DASING WENAGOSHIGI.
+
+Kije Manito kosina, kin gegeti apitchi debenimiiang, apitchi ki
+wawiiawaminimi agi ganawenimiiang nongo agi gijigak, kagini
+jawenimishinang, tchi mino niboiang, mi dash wakwing tchi pindigeiang,
+Apeingi.
+
+       *       *       *       *       *
+
+
+
+
+MI MANDA WENIJISHING ANAMIE NAGAMOWIN.
+
+   1. Jesus wegwisiian,   mojag gaie bekish,   ga gigangowiian,
+      ki mino wininimi,   ki mino wininimi.
+
+   2. Gwanatch Marie,   wakwi ge wi nisakonang,   inenimishinang,
+      wakwing tchi ijaiang,   wakwing tchi ijaiang.
+
+   3. Eve nitami akwe,    nin gi nisigona,   kin ki gi nigia,
+      ga bimadjiiamind,   ga bimadjiiamind.
+
+   4. Marie abiskon,   neta bata didjig,   wasenamaw gaie,
+      tebikadisidjig,   tebikadisidjig.
+
+   5. Miwitawishinang,   anotch maianadak,   bidawishinang dash,
+      mojag wenijishing,   mojag wenijishing.
+
+   6. Wabandaishinang,   eji ogimik Jesus,   kin ki gi nigia,
+      tchi wi agwashinged,   tchi wi agwashinged.
+
+   7. Ki sagiig Jesus,   ki ga babamitag,   kejewadisiian,
+      jawenimishinang,   jawenimishinang.
+
+   8. Kin gagangowiian,   gapakinawadwa,   kakina gigangwag,
+      akijewadisiian,   akijewadisiian.
+
+   9. Ineminishinang,   tchi bimadisiiang,   kagini go wakwing,
+      tchi wabamang Jesus,   tchi wabamang Jesus.
+
+  10. Win neso bejigod,   kitchi sagiada,   Jesus ogashiwan,
+      gaie sagiada,   gaie kitchi sagiada.   Apeingi.
+
+[Illustration: IHS]
+
+
+
+
+A.    B.    C.
+
+  A. a b c d e f g h i j k l m n o p q r s t u v w x y z.
+  A. a b d e g h i j k m n o p s t w tchi shi ka.
+  Mi. mi ma sa ta ga ge gi wa bi na ka ap ot iw.
+  Ag. ag ig iag jig og wag an in on wan kan ans.
+  Wab. wab ens ins ons win kin nin pin min sin.
+  Opin. o pin, o pi nig, a sin, a si nig, gi go, gi goi ag.
+  Kego. ke go, mi no, ma tchi, ki tchi, on dji, wen dji.
+  Metchi. me tchi, a ni ni, a kwe, gi sis, sho ni ia.
+  Asab. as ab, as ab ig, mi tig, pan gwi, a se ma.
+  Makwam. ma kwam, a gon, wa kwi, an ang.
+  Ashpiming. ash pi ming, o ta ban, ni dji, e na mi ad.
+  Akiwesi. a ki we si, a ki kons, mi shi min.
+  Enamiadjig. e na mi ad jig, mi na wa ni go si win.
+  Gega. ge ga, a ni shi na be, in en da mo win.
+  Gagikwewin. ga gi kwe win, we we ni, a na mie
+  wi ga mi gong, wi ij an, i ko, mo jag, tchi wi a nami
+  a i an, ash i wi, mi no to tan, gwa i ag, wi ishi
+  we bi sin, wi ni ta a na mi an, ga ki sheb, o na goshig,
+  ga i e, sha wen tchi ge win, wi sha sha wentchi
+  gen, mi pi, tash, ga ie, ke go, wi ka, wi matchi
+  to tan ge, go ni ma, sa na gen da mo win,
+  o ni shi shin, ma na tat, wi nat, ge ge ti, an wenin
+  ti so wi ni ko ta gi i ti so win, a pi tchi, ca tholik,
+  ish it wa win, a ni shi na be mo win, man ta,
+  Sagiiwewin, son gi te esh ka ge win, si ga an ta ti win,
+  Webinigewin, ki tchi twa eu ka ri sti win, a na mi e
+  Nominitiwin, me ka te o kwa na i e wi win, ga i e.
+  Anamie wi ti gen ti win, mi mi nik. A pe in gi.
+
+
+
+
+CARDINAL    NUMBERS.
+
+  Bejig                                        one.
+  Nij                                          two.
+  Nisswi                                       three.
+  Niwin                                        four.
+  Nanan                                        five.
+  Ningotwasswi                                 six.
+  Nijwasswi                                    seven.
+  Nishwasswi                                   eight.
+  Jangasswi                                    nine.
+  Midasswi                                     ten.
+  Midasswi ashi bejig                          eleven.
+  Midasswi ashi nij                            twelve.
+  Midasswi ashi nisswi                         thirteen.
+         "      niwin                          fourteen.
+         "      nanan                          fifteen.
+         "      ningotwasswi                   sixteen.
+         "      nijwasswi                      seventeen.
+         "      nishwasswi                     eighteen.
+         "      jangasswi                      nineteen.
+  Nijtana                                      twenty.
+  Nijtana     ashi bejig                       twenty one.
+         "      nij                            twenty two.
+         "      nisswi                         twenty three.
+         "      niwin                          twenty four.
+         "      nanan                          twenty five.
+  Nissimidana                                  thirty.
+  Nissimidana ashi bejig                       thirty one.
+  Nimidana                                     fourty.
+  Nanimidana                                   fifty.
+  Ningotwassimidana                            sixty.
+  Nijwassimidana                               seventy.
+  Nishwassimidana                              eighty.
+  Jangassimidana                               ninety.
+  Ningotwak                                    hundred.
+                      (Ashkwatj.)
+
+
+
+
+Transcriber's notes
+
+
+  Page 8:
+  Neso bejigod, mi sa weosimind. gaie wegosimind, gaie Kitchitwa Manito,
+  =>
+  Neso bejigod, mi sa weosimind, gaie wegosimind, gaie Kitchitwa Manito,
+
+  Page 42
+  Kije Manitowid. gaie eji anishinabewid, wiiaw,
+  =>
+  Kije Manitowid, gaie eji anishinabewid, wiiaw,
+
+  Page 59
+  kikendamoishin gaie dasing ga iji nishkiinowane, Apeingi
+  =>
+  kikendamoishin gaie dasing ga iji nishkiinowane, Apeingi.
+
+
+
+
+
+End of the Project Gutenberg EBook of A Short Compendium of the Catechism
+for the Indians, by N. L. Sifferath
+
+*** END OF THE PROJECT GUTENBERG EBOOK 40466 ***